How Should Be An Ideal Pashtun. Saleem Khan Advocate Of Swabi.
Saleem Khan Advocate, An Ideal Pashtun.
د مولانا صيب خانزېب ليک دے :
ژوندې اتل سليم خان اېډوکېټ.
د اټک ورته د خپل زوړ غېرت په ډاډ ورغلم
څو مړې ايرې او څه د نښې مېخکي پاتي وو .
اجمل خټک.
که زما نه څوک پوښتنه اوکړي چې پښتون څنګه وي ؟ نو زما جواب به وي لکه سليم خان اېډوکېټ ! هم د اوجرې پښتون دې هم د جومات هم د قانون په ژبه خبر دې هم د سياست اوجرې جومات په ادابو د سياسي غونډې وېناوال دې هم په اديره کښې د خپلو اتلانو په څلي خبره کوونکې دلاور انسان !
دغه سپېځلې پښتون څه ويريدلي خلک ويرول غواړي خو پدې نه دي خبر چې د باچا خان بابا دا لوستې جهانديده فکر لرونکې دا وګړې د هيچا ويريږي نه ! که ېرېدلې نو د پوځي ډیکټیټرانو د وخت نه تراوسه ديارلس ځل په زندانونو کښې څلور کاله درې مياشتې او درویشت ورځې بندونو به ويرولې وې د سوابۍ سيمه خوش بخته ده چې د وخت داسې اتل ئې زېږولې
که افغانستان کښې د څلوېښت کاله نه تيارې خورې دي بدبختې سرته نه رسي د کار خلک تې بار نړۍ ته ځي هر لس کاله پس ئې مزل د سره کېږي نو ېو لامل ئې دادې چې هلته سیاست ماتې خوړلې د سليم خان اېډوکېټ پشان د مېدان اتلان نه لري قامي سياست که تاله خپلواکي درنه کړي خو کم نه کم د خپل تاريخ سره دې تړلې ساتي د خپلو ستونزو او وسائلو نه دې خبروي د سليم خان اېډوکېټ پشان سياست مدار د پښتونخوا وطن ښکلا او ځلا ده دا خلک د خپل تاريخ سره همېش سم په ميدان ولاړ وي دا خلک په وژنه هم نه مري بلکې بيا بيا زرغونېږي
سليم خان اېډوکېټ د خپلې خاورې اصيل او حلالي بچې دې د خپل قام حقيقي،ترجمان ، دې په 1968 کښې په پښتون سټوډنټس فيډرېشن کښې وو چې د ،اجمل خټک ، د غيرت چغه ئې تر غوږه شوه دغه چغه ئې تر نن پورې په مازغو کښې پرته ده د ملي شعور او طبقاتي جبر په ضد ئې پښتو او ايمان دوپړک نه دې
په 23 مارچ 1973 کښې په لیاقت باغ کښې په هغه جلسه کښې هم وو چې په کمه کښې د بهټو په وېنا سياسي وګړي نېغ په نېغه ډزو کښې وژل شوي وو
سليم خان وائي زه خو په،عدم تشدد ،عقيده لرم چرته مې تراوسه په ،کلاشنکوف ،ډز قدرې نه دې کړې او نه مې چرته د ښکار مرغې ويشتې خو د خپل قام لپاره هرڅه ته غاړه ګدو حقيقت هم دا دې چې د عدم تشدد بيانيه د تورو او ټوپکو زوروه ده ځکه خو دغه فکر د عدم تشدد په تول پوره نظر نه بوګنېږي .
سليم خان اېډوکېټ ستر قامي مبارز دې پدې وخت کښې په پښتنو کښې که څوک د خپل تاريخ سره تړل شوې قامي مقدمه سمه او رونړه بیانوي نو هغه خلک ډېر کم دي پدغه لږو خلکو کښې ېو سليم خان اېډوکېټ هم دې سليم خان اېډوکېټ د خپل قام رښتيني تاريخي څېره ده .
ېو خوږ ژبې ويناوال دې خبره ئې په عقل او منطق ولاړه دومره پخه وي چې مخالف هم ورسره اختلاف نشي کولې هم دغه وجه ده چې د نړۍ په هر اصول برابر خبره کونکې د خپلې خاورې د بدبختې مونډ ته رسيدونکې ددې سړي د خبرې نه ډېر زورور نن ويريږي د خبرې جواب ئې چې څوک نشي کولې خپل عمل ئې بې دليله بربنډ ولاړ وي نو هغه بيا ټوپک بوڅ بوڅ کوي
د پښتونخوا په سوابۍ سيمه کښې د شېخ القرآن مولانا محمد طاهر په کلي ، پنج پير ، کښې په 1956 کښې زېږدلې د ېو درنې پښتنې کورنۍ سره ئې تعلق دې لوئي قانون پوهه او ستر سياست مدار دې د ، څلور پنځوس کاله ،نه تر نن پورې د باچا خان بابا د فکر سره ولاړ دې په عوامي نشنل ګوند ورته ډېر په احترام کتل کېږي
کله چې سليم خان ړومبي ځل په 1976 کښې د بهټو په وخت کښې زندان ته لاړې پلار ئې وېنا کړې وه چې هيڅوک به ورله ملاقات له نه ځي نه بې څوک ضمانت کوي خو چې کله خدائي خذمتګار ،غلام نبي بابا ، د هغه پلار له اوجرې له امبارکې له رالې چې ځوئي دې د قام په سر کښې زندان ته تلې امبارک دې شه ! سلیم خان وائي ددې نه پس راله پلار پخپله زندان ته رالې او په ژړا راترغاړې ووت .
سليم خان اېډوکېټ دومره خاورين سړې دې ېو ورځ ئې ماته وائل زه ستا د ليک نه ډېره ايزده کړه کوم ما وائل مشره مونږ خو ستاسو نه ايزده کړې کؤو وائل نه رشتيا درته وائېم !!!
زه به د غېرت چغه د بانګ پشانته وائمه
څکلي په بشر دي د پښتو د نشې بنګ ملنګ
مولانا خانزېب
Comments
Post a Comment
Thanks for visiting Pashto Times. Hope you visit us again and share our articles on social media with your friends.