Lyrics Of Pashto Song.
Nazam. Bad Margha Khoob
Poet. Abdul Bari Jehani
Singer. Shamali Afghan
“بد مرغه خوب”
ما په خوب کي یې لیدلې چي دي هار دانه دانه وي
لاس مي تش وي شونډي وچي او نسکوره پیمانه وي
ستا د ښار ټولي کوڅې وي د رقیب لښکر نیولي
د دښتونو پر لمنو د اجل خېمې وهلي
کور په کور پر هر قدم وي د غلیم ډلي ناولي
محتسب لېونی ګرځي ړنګه ښکلې میخانه وي
لاس مي تش وي شونډي وچي او نسکوره پیمانه وي
نه هغه مستي کوڅې وي نه پایکوب وي د مستانو
نه غزل پر غزل اوري نه آواز د مطربانو
نه پیالې پکښی ماتیږي نه نارې وي د رندانو
له سندرو اوښکي اوري په سرو ساندو ترانه وي
لاس مي تش وي شونډي وچي او نسکوره پیمانه وي
د خزان سیلۍ وهلي هم غاټول هم انارګل وي
باغ وي لاښ ګلونه وچ وي نه نرګس وي نه سنبل وي
د زاغانو خرمستي وي نغمې ورکي له بلبل وي
پر وچ ښاخ باندي سوځلې د بلبلو آشیانه وي
لاس مي تش وي شونډي وچي او نسکوره پیمانه وي
د پاتا کمبلي وینم ستا د ښار له دېوالونو
هدیرې وي چي ډکیږي د زلمیو له قبرونو
د بوډا نیکه ملا ماته د لحد له کلنګونو
ناوې ناسته پر پاتا وي بوډۍ سر پر زنګانه وي
لاس مي تش وي شونډي وچي او نسکوره پیمانه وي
د بلا ساه وي ختلې پر جونګړو پر کورونو
تور دودونه پورته کیږي له سوځلو جوماتونو
پردی ږغ پردی مُلا وي پر منبر پر منارونو
کوڅې تشي وي له خپلو ښار نیولی بېګانه وي
لاس مي تش وي شونډي وچي او نسکوره پیمانه وي
نه پانوس نه یې لمبه وي نه رنګونه د ستایلو
نه شرنګی وي د سازونو نه مستي وي د پایلو
نه د شمعی په خوله اور وي نه مضمون وي د غزلو
نه له اور سره په مینه ځان سوځلی پروانه وي
لاس مي تش وي شونډي وچي او نسکوره پیمانه وي
زه چي خپل قسمت ته ګورم دا خوبونه ریشتیا کیږي
ستا به هار دانه دانه وي زما به لاس نه در رسیږي
زما به وس وي پردی سوی ستا به سرې اوښکي توییږي
تش به نوم د جهاني وي نور به ختمه افسانه وي
لاس مي تش وي شونډي وچي او نسکوره پیمانه وي
شاعر : عبدالباري جهاني
سندرغاړی : شمالي افغان
Lyrics Of Pashto Song.
Nazam. Bad Margha Khoob
Poet. Abdul Bari Jehani
Singer. Shamali Afghan
Comments
Post a Comment
Thanks for visiting Pashto Times. Hope you visit us again and share our articles on social media with your friends.