Postural hypotension Explained In Pashto. Health Blog

postural hypotension.

Postural hypotension Explained In Pashto. Health Blog By Dr. Didar Yousafzai.

_نيم_حکيم

د پښتو متل دے - چې رښتيا را رسي نو دروغو کلي وران کړي وي - يو څو ورځې مخکښې مې يو پوسټ له نظره تېر شوے وۀ - چې د لسو زرو نه ډېر ځله خلکو شئېر کړے وۀ - د هغې پوسټ لب ولباب دا وۀ - چې څوک د شپې تشو متيازو ته پاڅي - نو ګنې چې عزرائيل عليه السلام خپل مرګ ته رابلي - او پۀ داسې خلکو د زړۀ دوره راځي - کۀ هغه روغ رمټ ولې نۀ وي - ځکه چې د ناڅاپي پاسېدو او بيا ودرېدو سره مزغو ته د وينې سپلائي ختمه شي - او روغ رمټ انسان د زړۀ د دورې نه وفات شي 

پۀ هداياتو کښې دا ليک وو - چې د وېښېدو نه پس يو نيم منټ هم دغسې سملاسته غواړي - بيا نيم منټ پۀ کټ کښې کښېناستل ، نيم منټ پښې د کټ نه ښکته زنګول او دغسې ټوټل درې نيم منټه ئې پوره کړي وو - خو زۀ تاسو ته وايم - چې پۀ دې خبرو کښې هېڅ حقيقت نشته - اکثر خلک د بې خوابۍ ښکار وي - نو هغو چې دومره وخت خپل خوب تختوي نو بيا ورله خوب نۀ ورځي - او ځينې خلک د hyperactive bladder ښکار وي - يا تشې متيازې نۀ شي ايسارولے - او د يو نۀ ډېر ځله راپاڅي نو هغو له هسې کار کتل دي 

رښتيا دا دي - چې ناڅاپه د ملاستې نه ودرېدل مزغو ته د وينې فشار کموي - خو د زياتو نه زيات پۀ روغ انسان سر ګرځولے شي - نور هېڅ مسئله نۀ پېدا کوي - دغې ته مونږ 

postural hypotension 

وايو - البته کۀ چاته د بلډپرېشر

 کمېدو او زياتو مسئله وي - نو پۀ هغو د ناڅاپي ودرېدو سره سترګې تورېدے شي - او د لوېدو له وجې ورته لوئے نقصان رسېدلے شي - هيڅوک هم د خوب نه پۀ منډه نېغ نه ودريږي - ځکه چې د انسان ټول عضلات بالکل پۀ نيم مرده حالت کښې وي - او انسان پۀ دمه دمه پاڅي - دغه فطري  احتياط پوره هم دے او ضروري هم 

ما مخکښې هم ليکلي وو - چې يو پۀ ګوګل د خپلو بيمارو علامتونه مۀ لټوئ - ځکه چې د ډېرو بيمارو علامات يو شان کېدے شي - او نيم حکيم خطره جان واله قيصه درسره کېدے شي - او بل دا قسمه غېرمستند پوسټونه مۀ شئېر کوئ - ځکه چې ستاسو له وجې ډېر خلک د نفسياتي مسئلو سره مخ کېدے شي 

ډاکټر ديدار يوسفزے

Pashto Times Pashto Health Blog. 

Postural hypotension Explained In Pashto. Health Blog by Didar Yousafzai. What Is Postural Hypotensian?