Shout, Crying or Shouting In Pashto. Words For Shouts. Learn Pashto

 Different Names and Words used for " Shout" " Shouting" Or Crying.  Cheegha, Chagha, Bughari, Kokaray Explained In Pashto. 

چیغې، کوکارې، بغاري ټول د انسان غږ پورته کولو ته وایي خو د پښتو په ټولو لهجو کې یې استعمال توپیر سره لري. د کرلاڼو په زیاترو لهجو کې چیغه ورته وایي

په نیمه شپه لیونۍ چیغې وکړې 

لکه ویشتلې هوسۍ چیغې وکړې 

( کاروان) 

چیغه په پښتو کې د قهرجن قومي لښکر لپاره هم استعمالیږي. 

د سر زورۍ انجام دې ولید 

د چیغې سر سر ته به تلې کونډه دې کړمه 

وزیر او مسید بیا چیغو ته سورې وایي

لرغونی مروج شکل یې بیا کوکارې دی لکه د شیخ اسعد په قصیده کې چې راغلی 

د فلک له چارو څه وکړم کوکار 

زمولوي هر ګل چې خاندي په بهار

خو د غلجیو په زیاترو لهجو، کندهار او ځینو نورو ځایو کې بغارې کلمه استعمالیږي

بله چاره نه وه اخر مې په ځان چارې وکړې 

په ډک محفل کې مې په یار پسې بغارې وکړې 

( ممتاز)

بغارې له بوغې راوتلې کلمه ده او بوغه د حیواناتو اواز ته ویل کیږي هغه هم د کورنیو اهلي حیواناتو اواز ته، دا کلمه بیا په ځینو لهجو کې د انسان د غږ لپاره هم مروجه شوې ده. 

شریف الله دوست په خپله یوه لیکنه کې بوغه له بګ( لوی) کلمې څخه راوتلې کلمه بولي.

 په پښتو کې هغه کلمې چې د حیواناتو د غږونو لپاره استعمالیږي زیاتره یې د حیوان غږ ته په کتو منځ ته راغلې دي لکه وری، غوا او وزه بع یا بغ غږ کوي او دا کلمه د دوی له غږ سره مناسبه ورته جوړه شوې ده یعنې بوغه کوي او بغیږي، پیشو میو کوي، سپی غپیږي، چرګه کوټ کوټ کوي، لیوه انګولا کوي، خر هنګیږي، اس شڼیږي، مرغۍ چوڼیږي

By Samiullah Salehi. Pashto Learning Blog. Learn Pashto language reading. Bugharay Wahal, Kokay Wahal, Chaghay Wahal.