A Pa Khoob Oda Mashoma. Pashto Poem By Abdul Bari Jehani
اې په خوب ویده ماشومه!
اې په خوب ویده ماشومه ته خبر یې؟
چي په ښار او په مالت کي څه تیریږي
ته پوهیږې د ابا سیوری دي څه سو؟
او ابۍ به دي له کوم رنځه کړیږي
ته خبر یې د تودې خوني له خونده؟
تا هم کړي دي د اور څنګ ته خوبونه؟
ته هم چایې په توده غېږ کي نیولی؟
الاهو دي نازولي دي غوږونه؟
د خټین او د واورین سړک پر غاړه
درته ایښي د څپلیو دي رنګونه
نیم وجود دي په زړو جامو کي پټ دی
له یخنیه دي بې واکه دي لاسونه
کشکي ستا په خاطر لمر وای راختلی
کشکي ستا پر لوڅ بدن وای ځلېدلی
ستا پر لوري د اسمان سترګي ړندې دي
تور قسمت په تا آرام نه دی لیدلی
اوس هغه خلک هم لوڅي پښې روان دي
چي په تا یې رنګول زاړه بوټونه
نن به څه خورې سړه ورځ پر تېرېدو ده
نن په څشي تودوې ساړه رګونه
اې په خوب ویده ماشومه ته خبر یې؟
چي اسمان پر تندي څه درته لیکلي
لا تر څو به دا سړې دا اوږدې شپې وي
لا تر څو به دي قسمت په غشیو ولي
چي له ستوني دي آواز نه وي وتلی
څوک به پوه سي چي له چا به ګیله من یې؟
دا وطن دی د رنځورو او خوږمنو
هسي نه چي دا یو ته په زړه خوږمن یې
ته بچی د بد نصیبو د وطن یې
چي اسمان ورته نجات نه دی لیکلی
قصابان یې د لېوه له زامو ژغوري
دریم لوری یې د ژوند نه دی لیدلی
ستا پر تور تندي لیکلي کرښي وايي
تر لحده به دي ستړی زکندن وي
هغه ورځ چي نه لېوه نه قصابان وي
نه به زه یم نه به ته نه دا وطن وي
عبدالباري جهاني
د ۲۰۲۱ کال د ډسمبر درویشتمه، ویرجینیا
Pa Khoob Oda Mashoma. Pashto Poem By Abdul Bari Jehani. Pashto Times Pashto Poem for Boy Sleeping on Footpath In Kabul. Shoe Shiner Child Boy In Kabul Sleeping Roadside. Pukhto Nazam da Abdul Bari Jehani.
Comments
Post a Comment
Thanks for visiting Pashto Times. Hope you visit us again and share our articles on social media with your friends.