Rahmat Shah Sayel Tribute To Nizar Yousafzai. Nazam

 Rahmat Shah Sayel Tribute To Nizar Yousafzai.

نظار// رحمت شاه سايل

(هغه په زړه مضبوط سايل ما په لومړي ځل دومره کمزوری وليد. د سايل صاحب د څنګ ملګري، د ټول عمر ملګري، د راز و نياز ملګري له هغه بېل شول خو هغه ما داسې ژړغونی نه وو ليدلی. سايل صاحب وایي چې ما ته د خېبر اپريدي د مرګ څه وخت پس د هغه په ياد کې په مشاعره کې پته لګېدلې وه چې زه په زړه دومره مضبوط څوک نه يم، د خېبر په مرګ ليکل شوی نظم «مرثيه» مې وا نه ورولې شو. د نظار يوسفزي په پاتا کې د خبرو پر مهال شايد سايل صاحب بيا له هم هغسې کېفيت سره مخامخ شوی وي. په وېډيو کې دا يوه خبره پر زړه ستنې څرخوي چې سايل صاحب وايي چې په کومو سيمو کې يې ملګري لرل، هلته اوس ځان يوازې احساسوي. سايله! مونږه تل د بېلتانه سندرې وايو/مونږ تل په پال نيولي د مارغانو آوازونه)

چړې  د بيلتانه  دې  په زړه داسې  راښخېږي

نظاره اوس مې ستا تصوير ته سترګې نه غړېږي

تصوير دې راته اوس هم کوي ستا په شان خبرې

خو  ستا تنده  مې ستا په تصويرونو نه ماتېږي

په  ټوله پښتونخوا کې راپره شوم خو نظاره

په  ټوله پښتونخوا  کې بل نظار نه پېدا کېږي

تا  ټال  زموږ د خيال خېژوو بره خبر نه وو

چې ورسي اسمان ته ددې ټال پړي به شلېږي

تقسيم به کړم پرې هر کله د اوښکو ډکې سترګې

ګلونه ستا د لاس به رانه چرې نه وچېږي

ستا روح به ستا نه لاړ شي د پښتون وطن نه نه ځي

دا  تخم  به په  دې  خاوره کې  بېرته  زرغونيږي

ما  هسې  هم  په  هيچا  مرثيې  ليکلې  نه  دي

په تا خو  ژوند په خپله لکه  ژوند  ليکلې  کيږي

صابر وو که زيار وو که ساحل ټول دې راياد کړل

بيلتون به مې تر څو داسې په سترګو کې رالوېږي

(رحمت شاه سايل)