Weight Loss Explained In Pashto By Dr. Didar Yousafzai
#_ډائيټنګ_مۀ_کوئ_خو
ډېر ملګري اکثر د وزن د زياتوالي ښکار وي - پۀ کراچۍ کښې خصوصاً دا مسئله د غېر معياري اوبو سره تړلې ده - دلته اوبۀ ډېر نقصان رسوونکي کېميکل او جراثيم لري - چې پکښې کلورين ، فلورائيډ او تانبه مهم دي - چې وجود ته ډېر ضرر رسوي - پکار ده چې د څښو اوبۀ د استعمال نه مخکښې تر شپږو ګنټو پورې نمر ته کېښودے شي - نمر ترې جراثيم اووژني - د خوټکولو سره ترې هم جراثيم ختميږي - خو تانبه او کلورين بيا هم لري - د دې سره پۀ هوا کښې دوړه ، غېر متوازن خوراک او د ورزش نشتوالے دغه مسئله نوره هم خطرناکه کړي -
اکثر خلک وائي ډائيټنګ کووم - او وزن مې نۀ کميږي - د ډائيټنګ هېڅ ضرورت نشته - پۀ مړه خېټه ډوډۍ خورئ - خو دا خيال ساتئ - چې د ساده شوګر د خوراک نه اجتناب اوکړئ - د تورو يا سرو غنمو ډوډۍ خورئ - سپين وړه زهر دي - خړې يا زيړې وريژي استعمالوئ - چې پټ ترې نۀ وي لر شوے - سپينې ورېژې ښې نۀ دي - کۀ ناروغي نۀ لرئ نو هر قسمه فروټ خورئ - خو کېلا به پخه او زيړه نۀ خورئ - د ډالډا غوړو پۀ ځائے د پخلي تېل استعمالوئ - د چينۍ او مالګې استعمال د کم نه کم کوئ - او کۀ خامخا مو زړۀ وي - نو د چينۍ پۀ ځائے ګوړه استعمالوئ
د سبزيانو او دالونو استعمال زيات کوئ - د تڼکې او ترخې مسالې استعمال کم کوئ - غټه غوښه زهر دي - کۀ وس مو کيږي نو پۀ هفته کښې يو ځل چرګ او مهے خورئ - او دغسې پۀ وچو مېوۀ کښې د کاجو نه علاوه هر څۀ د خپل وس مطابق خوړے شئ - د ډوډۍ نه مخکښې د اوبو کوټه پوره کوئ - پۀ مينځ کښې کۀ ممکنه وي اوبۀ مۀ څښئ او پۀ ډوډۍ پسې سمدستي اوبۀ بيخي مۀ څښئ - پۀ هرې ډوډۍ پسې کم از کم لس منټه ګرځئ - سافټ ډرنک لکه پيپسي ، کوک او د نورو استعمال ډېر مضر دے - دا کاربونېټډ وي او د معدې صحت ترې ډېر زيات متاثره کيږي
د فيرني يو پلېټ ستاسو وزن دومره سېوا کولے شي - چې د درې مياشتو پۀ ورزش نۀ راګرځي - او بيا د دې عادت لکه د نشې ډېره خطرناکه خبره ده - پراسس شوے خوراک لکه برګرې ، چپس او داسې نور غېر صحتمند وي - د وزن زياتوالے د وجود هر نظام متاثره کوي - چې پۀ نتېجه کښې ئې زړۀ ، معده ، ګردې او زنګونان نېغ پۀ نېغه متاثر کيږي - د دې اسان او ارزان روټين سره نۀ يواځې تاسو پۀ مړه خېټه خوراک کولے شئ بلکه د وزن د زياتوالي د ناسور نه هم ځان خلاصولے شئ -
ډاکټر ديدار يوسفزے
Weight loosing Habits Explained In Pashto by Dr. Dedar Yousafzai
Comments
Post a Comment
Thanks for visiting Pashto Times. Hope you visit us again and share our articles on social media with your friends.