Nawagai Momando Wrana Krala. Explanation Of Pashto Folk Song.
ليک کاروان مومند صيب
ناوګۍ_مومندو_ورانه_کړله_دښار_نوابه
او ورله راکاږه توپونه
ناوګۍ مومندو ورانه کړله د ښار نوابه
Nawagai Momando Wrana Krala, Da Khaar Nawaba.
اوبۀ په ډانګ نۀ بېلېږي او دغه مثال د مهمندو او باجوړ هم دے . چې کله هم د بهرنيو زور ظلم راغلے يا مقامي ظلم نو دوي يې په شريکه مخالفت کړے او ورپسې يې لښکر کړے
خو د ناوګۍ د واقعې يو ځانګړے رنګ دے
کله چې د باجوړ نواب صفدر خان وفات شۀ او د هغۀ ځوي مندالي خان ته د نوابۍ او مشرۍ پټکے ور په سر کړے شۀ
نو مندالي خان کې د مشرۍ او نوابۍ هغه لياقت نۀ وۀ.
دا نوابي د مهمندو دروازګۍ پورې رسېدلې وه چې پکې صافي قوم نه علاوه نور هم لګ ډېر واړۀ واړۀ کلي راغلي وو چونکه هغه وخت ابادي هم ډېره نۀ وه د نن په نسبت .نو نن چې کومې غټې علاقې يا کلي شول دا خو هغه وخت دا شان ګنجان اباد او يا د زيات طاقت نۀ وو
مندالي خان د صافو سره زياتے کولو او يوه ورځ صافو د نواب د اشر نه انکار کړے وو چې په هغې سره د نواب لښکر د شپېتۀ 60 نه زيات کسان وژلي وو
پس لۀ هغې نه صافو هم د مهمندو نورو مشرانو نه مدد درخواست وکړو او بيا د مهمندو مشران کلي په کلي وګرځېدل او د پېغور په طور يې خلک د نواب خلاف بېدار کړل او اخېر دا چې يو لښکر تيار شۀ
دغه لښکر په ناوګۍ کې د نواب د قلعه نه تاؤ شۀ او تر شپږو ورځو پورې يې قلعه محاصره کړې وه
په دغه وخت کې د قلعه د محاصرې نه بهر ازاد کسان کوم چې د نواب رعايه او يا ملګري وو هغوي د ښار نواب نه مدد وغوښتلو
د ښار نواب امدادي لښکرې مدد د پاره راورسؤلې خو نواب مندالي خان تسليم شوے وۀ. ځان يې ورک کړو او په دغه روپوشۍ کې د دنيا نه لاړو
چونکۀ ددې واقعې په ليکلو کې غټ رول د مهمندو او باجوړ ښځو يا اولسي شاعرانو ادا کړے خو په شاعرۍ کې د ورځ يا مياشتې ذکر نۀ دے شوے
دا سندرې او يا ټپې د مهمندو او باجوړ د دواړو اړخونو نه ويېلے شوي او اکثره ټپې دوه طرفه دي لکه د مثال په طور
مهمندو به ټپه کوله چې ،
په باجوړو دې صد رخمت وي
د ښار نواب ورله شراب ورکړي دي
د مهمندو مشرانو ګڼل چې د باجوړ ټول خلک د نواب نه تنګ دي خو څوک غږ نۀ کوي خو په هر ځاے کې د تصوير دوه مخه وي او دواړو طرفو ته کسان وي لکه څۀ د نواب خلاف او څۀ ملاتړ نو خلکو فکر کولو چې نواب دوي له څۀ نشه ورکړې ځکه زمونږ خلاف جنګېږي او د ظالم ملاتړ کوي
خو بل طرف ته د باجوړ ښځو به د وادۀ يا بلې خوشحالۍ په موقع په دغه ټپه باندې طنز کولو او ويېل به يې چې،
بعضي به دا پکې ويېله
د ښار نواب ورله شراب ورکړي دي نا
په دې سندرو او ټپو کې ډوډا يا ډېوډا برج ډېر ذکر شوے معلومېږي دا چې سخته مورچه پکې همدغه وه يو طرف ته د نواب لۀ خوا ګوله باري بل طرف د نواب د ملګرو د لښکر د راتګ وېره هم وه.
بل دغه محاصره شپږ ورځې وه نو د اوبو او خوراک کمے ډېر زيات وو ځکه چې د دغه احساساتو ښځو او اولسي شاعرانو اظهار څۀ په دې ډول کړے دے.
د دې ډېوډا د برج د لاندې
چا د اوبو چا د ديدن ارمان کوۀ نا.
د دې ډېوډا د برج د لاندې
د درايي د خولو پنډ مې وتاړۀ نا.
د دې ډېوډا د برج د لاندې
ځوانان پراتۀ وو سپينې خولې ببر سرونه .
په باجوړو دې صد رحمت وي
د ښار نواب ورله شراب ورکړي دينه
د ښار نواب قسم خوړلے
د تحصيلدار په مرګ به ډېرې کونډې کړمه
چې باجوړي په اتفاق وي
هغه مورچه به کوم سړے پورته کوينه
د مهمند هرځاے کې تاريخ دے
ورور جانه مۀ کوه بې ځايه غېبتونه
هلکه هلته کم بختے وو
چې په شلخي ټوپک يې جنګ ونخلوۀ نا
د ښار نواب قسم خوړلے
شينکي اسونه شړنګېدلي جنګ له ځينه
نوکر به يې ولې توره نۀ کړي
د ښار نواب ورسه پخپله جنګ له ځينه
کاروان مومندنوټ:-(برج) زمونږ خلک په کور کې د دشمنۍ يا جنګ نه د دفاع د پاره د انګرېزانو د وخت نه د ګټو يو Stopa
سټوپا شکل کې اوچته مورچه جوړوي چې اکثر دايري يا ګول شکل کې وي بهر نه ټول کاڼي لګېدلي وي او په مېنځ کې يې پاس چت ته سېړۍ ختلي وي بيا په هغې د ټوپک د پاره ګېر چاپېره نري نري سوري وي چې هر خوا ته ترې ډز کولے شې او دا د کوټې نه تقريباً دوه چنده اوچته جوړه وي چې ټوله علاقه ترې ښکاري
Nawagai Momando Wrana Krala. Explanation Of Pashto Folk Song.
Pashto Times Tags. Pashto Old Pashto Song. Nawagai Momando Wrana Krala. Da Khar Nawaba.
Complete Story Of How Safi Momand Attached Nawab Sadar Khan Of Nawagai Bajaur.
Comments
Post a Comment
Thanks for visiting Pashto Times. Hope you visit us again and share our articles on social media with your friends.