Ghani Khan Baba, Marg, Janan Aw Mula Jan. By Younas Khan Buneri.
Ghani Khan Baba, Marg, Janan Aw Mula Jan.
د زنګ لاندې شمشیر
( اوومه برخه )
غنی خان دمرګ په باب کښې هم د ملا سره اختلاف لری او ملا چې په کوم انداز کښې د مرګ تصویر کشی کوی نو غنی خان د هغې فلسفې په قطعی توګه باندې رد کۍ او د دې لوړ کار کول جرآت هم د عارفانو کار دې ولې چې ظاهربین خلق مرګ یوه توره بلا تصور کوی او په خوف کښې ترې مبتلا وی خو دا د عارف کمال دې چې عوامو ته د مرګ هغه ښکلې اړخ وړاندې کوی چې زما پشان یو ګنهګار انسان هم دې ته تیار شی چې هغې دې هم د مرګ تمنا د زړه له کومې اوکړی او عارفان وايی هم دوﺉ ته څوک چې عوام د الله د هر امر په حکمت باندې ښه په دلیل سره پوهه کړی
عارف او عالم کښې څه فرق دې ۔۔؟ ډیر ملګری ماته ډیر په فخر سره وايی چې ما خپل بچې په مدرسه کښې کښینولې دې او عالم ترې نه سازول غواړم ته دعا اوکړه چې ځما بچې عالم شی نو زما ورته دغه وینا وی چې عالم ترې مه سازوه بلکه عارف ترینه ساز کړه هغوﺉ تندی تراؤو کړی او ځما په مقصد ځان پوهه نه کړی ولې چې عوامو ته خو د محسوساتو علم یو لوﺉ نعمت ښکاری او بیا يې دا لالچ هم وی چې ځَه که ځه هر څومره ګنهګار شم خو چې بچې مې علم حاصل کړی نو جنتی به شم خو داسې خلق ځما د محبوب صلی الله علیه وسلم په دې ارشاد نه وی رسیدلې لکه چې فرمايی ۔۔ الناس کلهم هالکون الا عالمون والعالمون کلهم هالکون الاالعاملون والعاملون کلهم هالکون الاالمخلصون والمخلصون فی خطر شدید ۔۔ یعنی تمام انسانان به جهنم ته ځی خو عالمانان به سلامت وی او تمام عالمانان به دوزخ ته غورزیږی خو په خپل علم چې چا عمل کړې وی هغوﺉ به سلامت وی او ټول عمل کونکی به هم جهنم رسید کیږی خو صرف مخلصین به ترې سلامت وی خو ولې د اخلاص خاوندان په ډیره خطره کښې دی ۔۔۔
د تحقیق نه دا ثابته ده چې مخلصین فقط عارفان دی او د ظاهر بینه عالمانو په دې قیمتی ګنج کښې هیڅ برخه نه وی او دا یوازې غنی بابا نه دې چې ګنی هغه په ظاهربینو علماوو تنقید کړې دې بلکه خوشحال بابا هم د محسوساتی علماؤ او د معرفت د علماؤ په مینځ کښې په دې ډول کرښه راکاږی لکه چې وایی
چې دستار تړی هزار وی
خو ۔۔ د دستار سړی په شمار وی
یعنی د دستار تړلو لایق هغه عالم دې چې عرفان لری او بل ځاﺉ کښې خوشحال بابا داسې ارشاد کۍ
ملایان او شیخان ډیر دی بې حسابه
د خوشحال خټک پکار دی عارفان
ولې چې ځان او قام د شخړو او مصیبتونو نه هغه نران ویستلې شی د چا سره چې د معرفت هنر وی ځکه چې د معرفت د هنر په مقابله ټول هنرونه او پوهې بې معنې او فاسدې شی
ځمونږ د ډیرو پوهانو خلقو هم دا خیال دې چې غنی خان لیونې فلسفی وو او هم د دې فلسفې د لیونتوب اثر وو چې غنی خان د مذهب په واکدارانو باندې ګزار کړې دې خو د دې خلقو دا خیال زما په نیز بیخی فاسد دې ولې چې غنی فلسفی نه وو بلکه عارف دې خو د عرفان د رنړا نه نابلده خلق د غنی بابا دې عرفان ته فلسفه وایی کوم چې د بابا سره سراسر ظلم او زیاتې دې ولې چې دا خبره د تجربې نه ثابته ده چې د عرفان د علم نه محرومه فلسفیان د الله د وجود نه انکاری وی لکه دغسې یو فلسفی شاعر خو اشرف مفتون هم دې خو ولې د هغه شاعری د معرفت نه خالی ده او په ډیرو شعرونو کښې يې شیطان ته یار او جانان ويیلې دې خو غنی بابا چرې هم د خداﺉ د وجود نه انکاری نه دې او خداﺉ ته هغه حسن ويیلې مینه وییلې او یار او جانان ويیلې دې دا فرق دې په فلسفی او په عارف کښې ۔۔۔ فلسفی چې چاته یار وایی نو عارف ورته دښمن وایی او فلسفی چې د کومې هستۍ د وجود انکار کۍ نو عارف ورته یار او جانان وایی او دغه رنګې دا د معرفت نتیجه ده چې د الله کوم امر چې عوام خلق بلا او آفت ګنړی د ژوند د رونق دښمن یی ګنړی نو د معرفت نه باخبره عارف ورته د ژوند ښکلا وایی لکه غنی بابا نه هم له مرګه بوږنیدونکې عوام په دا رنګ تعجب کښې پوښتنه کۍ
وې وایه لیونیه خلق وﺉ ته مرګ ته خاندې
دا دې کښې د خندلو څه خبره ده آشنا ۔۔؟
( نور بیا انشآ ءالله )
Comments
Post a Comment
Thanks for visiting Pashto Times. Hope you visit us again and share our articles on social media with your friends.