Olas Janan Kra No Da Tool Olas Janan Ba Shay. Pashto Ghazal Lyrics.

 Olas Janan Kra No Da Tool Olas Janan Ba Shay. Pashto Ghazal Lyrics.

Poem By Rahmat Shah Sayil

Singer. Haroon Bacha

ولس جانان کړه نو د ټول ولس جانان به شې

که لږ په خپله ځمکه ودرېدې اسمان به شې

په تنهايۍ کې وي بې دره بې دياره سړى

د زړونو کور کلي له راشه نو ودان به شې

د ژوند په شور کې ځينې ځينې اوازونه اوره

که ناست يې پابه څې که پاڅېدې روان به شې

ستوري خالونه په تندو کړه د وطن د ښکلو

تيارې دې نۀ شي پټولى چراغان به شې

د پردي سيوري نه په خپلو سرو غرمو کې ښه يې

دلته به ډېر ګران يې که هلته شوې ارزان به شې

د خپل پرهر د درد د سرو ګلونو ژبه زده کړه

په خپل ګل به شې د ګل د خاندان به شې

ماتول هېڅ نه دي مشکل د نفرتونو پولې

د مينې لار واخله يقين به شې ايمان به شې

بيا به تمبېږي د پلکونه ګوزارونه درنه

د ستمګرو مينه وکړه نو سندان به شې

يا بنجارى شه يا ملنګ د پښتنو د کوڅو

سايله دا اعزاز حاصل کړه شاه جهان به شې!