Irada Nazam. Rizwanullah Shamal Nazam Irada. Pashto Poetry.
Pashto Nazam Irada By Rizwanullah Shamal Of Dir Lower. Ghazal, Pashto Shayeri.
پۀ خپله مورنۍ ژبه پُښتو ، پُښتونولۍ آؤ خپل پُښتون قام مئین دَ ډېر محترم خاکسار آؤ ملنسار نوموړي شاعر ښاغلي رضوان الله شمال صېب نظم " اِراده " خپلو ټولو ملګرو ته پۀ ډېره پُښتنه مینه ډالۍ ـ هیله لرم چې خوښ ئې کړئ ـ مننه آؤ اِحترامات
نوټ! دا نظم مې دَ شمال صېب دَ یو ویډیو نه لیکلے دے ـ کۀ څۀ کمے زیاتے رانه پکښې شوے وي ـ نو دَ شمال صېب نه اؤ هم دَ نورو ملګرو نه بخښنه غواړم
دویمه خبره چې کیمه دو نو هغه دا دو چې امارا یہ عکس اُس وخت کا هے جب سړے بیخي ځوان تها ـ جو دَ یو چا پۀ غوښتنه مې ایسته وروشغولو نو خو نو ھھھھھھھھھ
طبقات دي تضادات دي آګري نګري ده ړوند راج دے
اے دې ته کۀ څوک وائي چې سماج دے دا سماج دے
♥♥اِراده♥♥
دَ ویخې پۀ یو خوب کښې مې یو خیال راپورته شوے دے
تعبیر ئې ځنګوومه لکه ټال راپورته شوے دے
مهدي پۀ مقابل کښې دَ دجال راپورته شوے دے
زما پۀ دې نظام باندې یو سوال راپورته شوے دے
پۀ لاره پۀ وله آؤ پۀ سړک جاګیرداري ده
دَ هر چا نه جوړ شوے دے ملک جاګیرداري ده
دَ خټو دَ بیګار آو دَ کنډک جاګیرداري ده
دَ جنګ دَ آشرګرندو پۀ ټوپک جاګیرداري ده
نو دَ چا پۀ دسترخوان چې پۀ یو وخت کښې څومره بیاج دے
نو دومره دَ غریب دَ لوږې ټول عُمر علاج دے
طبقات دي تضادات دي آګري نګري ده ړوند راج دے
اے دې ته کۀ څوک وائي چې سماج دے دا سماج دے ؟
نو زما دَ دې سماج دَ بدلولو منصوبه ده
زما سره پۀ تاسو کښې دَ چا ، چا اراده ده ؟
کۀ ګز وهلے کیږي کۀ څپق وهلے کیږي
خو دلته کښې دَ هر کمزوري حق وهلے کیږي
دَ حقې پۀ خبره پسې پړق وهلے کیږي
عظمت دَ سړیتوب دلته پۀ شړق وهلے کیږي
نظام څۀ دے پۀ شمار کښې دَ راغلي ککرو دے
نظام څۀ دے دَ دغو څو مړو سړي خورو دے
نظام څۀ دے دَ دوي لاس آؤ زمونږه دَ مرو دے
نظام څۀ دے پۀ پوست قالین دَ هسې مشورو دے
نو قیصې مو دَ نیکونو آؤ دَ نیا هر څۀ غلط دي
کۀ وید دے کۀ ګوسپل دے کۀ مونیا هر څۀ غلط دي
تاریخ خو دې خُدائے ډک کړي پۀ سنکیا هر څۀ غلط دي
دَ دې نظام تادې مادې ګوڼیا هر څۀ غلط دي
زما دَ دې ګوڼیا دَ سمولو منصوبه ده
زما سره پۀ تاسو کښې دَ چا ، چا اراده ده ؟
چا دَ خپل دولت آؤ سرمائې نه بُت جوړ کړے دے
چا دَ خپل جاګیر آؤ مرتبې نه بُت جوړ کړے دے
چا دَ قام قبیل آؤ عقیدې نه بُت جوړ کړے دے
هر سړي دَ خپلې نظرئې نه بُت جوړ کړے دے
چا دَ خپل پټکي دَ قرقرې نه بُت جوړ کړے دے
چا دَ نام نهاده عمامې نه بُت جوړ کړے دے
چا دَ خوشامندې د صِلې نه بُت جوړ کړے دے
چا دَ زور اؤ غصب دَ قیصې نه بُت جوړ کړے دے
نو ریچ پۀ ریچ کول به غواړي دا وهم آؤ دا بُتان
دا بُتان زما بُتان آؤ ستا آؤ دَ هر چا بُتان
دغه دَ فرېب آؤ دَ درغو دَ أنا بُتان
نۀ ښائي پۀ شپه کښې پۀ أئین کښې دَ رڼا بُتان
زما دَ دې بُتانو ماتولو منصوبه ده
زما سره پۀ تاسو کښې دَ چا ، چا اراده ده ؟
یا حاجي حج دې مُبارک شه خو نهر نۀ وینې
هر کال دې حج دے خو بې کوره در پۀ در نۀ وینې
لاره کوڅه کښې پښې آبله پښې آؤ سرتور سر نۀ وینې
ګُناه دې وینې دَ غُربت دَ وباء غر نۀ وینې
ستا دَ سرود دَ محفلونو نه قُربان خانجي
لکهونه شنې قودې نچه کړې پۀ یو أن خانجي
چرته پۀ خیال کښې دې راغلي غریبان خانجي
ستا کوټه ایز دَ ټوک ډوډۍ دي پۀ آرمان خانجي
پۀ یو نیم بنیادم باندې څۀ بل شانتې نیستي ده
اؤ پۀ یو نیم بنیادم باندې څۀ بل شانتې هستي ده
دَ چا ماړۀ آرګي سخا دي پۀ چا باندې قاتي ده
رښتیا خبره دا ده دا زیاتي برخه زیاتي ده
زما دَ دې زیاتي مال دَ ویشلو منصوبه ده
زما سره پۀ تاسو کښې دَ چا ، چا اراده ده
هغه چا ، چې وې چې وخت به راځي کله به راځي
پۀ مونږ چې شنۀ را ؤټوکیږي هله به راځي
زمونږ دَ څۀ تدبیر آؤ دَ عمله به راځي
کۀ مونږ به داسې ناست یُو آؤ پخپله به راځي
دَ عقل آؤ شعور پۀ آبیارۍ کار شروع شوے دے
دَ خلکو دَ وجدان پۀ تیارۍ کار شروع شوے دے
دَ دې موجوده حال پۀ تباهۍ کار شروع شوے دے
دَ بل نظام دَ پاره پۀ شپېلۍ کار شروع شوے دے
پۀ خپل عزم ولاړ یُو څو کپرې مې پکار دي
سپرغۍ سپرغۍ سړي لکه بڅري مې پکار دي
یوازې خو خُدائے ښۀ دے څو ملګري مې پکار دي
ملګري مې پکار دي خو کمرې مې پکار دي
زما دَ بل بُنیاد دَ ایښؤدلو منصوبه ده
زما سره پۀ تاسو کښې دَ چا ، چا اراده ده
نابود شوه توراڼکه ، توت خورکه لۀ وحشته
پۀ ګُل هم کېناستې نۀ شي لولکه لۀ وحشته
زمونږه زندګي هم کونجیلکه لۀ وحشته
بدلون داسې چې خلاصه شي دا زمکه لۀ وحشته
بدلون چې آډانه ئې روڼ شعور وي آؤ وجدان وي
بدلون چې ئې آساس آؤ مرکزي نقطه اِنسان وي
بدلون چې ئې بُنیاد دَ ژوندانۀ ساز و سامان وي
بدلون چې پکښې یؤ موټے دا زمکه آؤ آسمان وي
بدلون چې آهلیت پکښې معیار دَ مرتبې وي
بدلون چې آزادي پکښې دَ ژوند آؤ عقیدې وي
بدلون چې اِحترام دَ اِنسانانو دَ ریشتې وي
بدلون چې تقّدُس پکښې دَ شال آؤ لوپټې وي
زما دَ دې بدلون دَ راوستلو منصوبه ده
زما سره پۀ تاسو کښې دَ چا ، چا اراده ده
دَ پنجو نه به خلاصه شي دَ تور آؤ پېغور زمکه
جنت کښې به بدل شي دَ دوزخ غوندې اُور زمکه
چې شاړې پکښې نۀ وي دَ چا دَ پلار آؤ دَ مور زمکه
چې هر سړي له ورکړې شي دَ کر آؤ دَ کور زمکه
چې هر سړے موړ پټ وي زکاتونه پکښې نۀ وي
چې سوال آؤ سرسائې آؤ خېراتونه پکښې نۀ وي
صابون آؤ مُړدیګان آؤ اسخاتونه پکښې نۀ وي
دَ هر کور ځانله ځانله جماعتونه پکښې نۀ وي
دَ ظُلم آؤ دَ جبر نه سلګۍ راپېدا کیږي
پۀ خلکو کښې اِحساس دَ کمترۍ راپېدا کیږي
دَ عدم مساوات نه محرومۍ راپېدا کیږي
بیا دَ محرومو نه تباهۍ راپېدا کیږي
نو تعمیر له مې دا شتۀ دَ ورانولو منصوبه ده
زما سره پۀ تاسو کښې دَ چا ، چا اراده ده ؟
هسې پۀ تنقید آؤ پۀ غندلو باندې نۀ کیږي
تش پۀ احتجاج ریکارډ کولو باندې نۀ کیږي
نۀ کیږي خېرو آؤ پۀ کنځلو باندې نۀ کیږي
حق پۀ خوار پیړقه خُلۀ غوښتلو باندې نۀ کیږي
چا ته پۀ سوالونو منتونو باندې نۀ کیږي
ژوند تش پۀ سلګو آؤ پۀ آهونو باندې نۀ کیږي
خپل مرام ګټل خو پۀ خوبونو باندې نۀ کیږي
نۀ کیږي " شـــــماله " پۀ ویرونو باندې نۀ کیږي
نو چرته دے ملنګ دَ آکوړي راله خبر کړئ
څۀ شو دَ مومندو کاکاجي راله خبر کړئ
تُوره چې وهي فقیر ایپي راله خبر کړئ
خلکه محمد جان نومې غازي راله خبر کړئ
دَ سر نه مې دنګلي دي یو خُدائے ته مې آسره ده
پۀ تاسو کښې دَ چا وینه زما غوندې تؤده ده ؟
پۀ ډېر درنښت ستاسو ورور جمیل خان
Irada Nazam. Rizwanullah Shamal Nazam Irada. Pashto Poetry.
Pashto Nazam Irada By Rizwanullah Shamal Of Dir Lower. Ghazal, Pashto Shayeri. Pashto Sherona. Pukhto Adab. Pashto Times
Comments
Post a Comment
Thanks for visiting Pashto Times. Hope you visit us again and share our articles on social media with your friends.