Khushal Khattak Baba Pashto Ghazal Describing Beauty Of His Beloved

Khushal Khattak Baba Pashto Ghazal Describing Beauty Of His Beloved.

تور ګيسو دې په چندڼ باندې ښامار دي

تورې زلفې د سنبل د نوبهار دي

چې وَ ملا او کوناټيو ته دې ګورم

اويزاندې پاغوندې په نري تار دي

.

تورې سترګې د هوسۍ د خطا شوې

چې وَ څړ وَ تَه پرتې په سنبل زار دي

. 

تورې وروځې دې لينده، باڼه دې غشي

عاشقان يې زخمي شوي په ګوزار دي

. 

مصفا تندی دې ښه دی تر بلوره

بیدلان يې په سَرونو خريدار دي

.

دغه خال چې دې د وروځو په پيوند دی

د خطا د ملک اصلي نافې ترې زار دي

.

سپينه پوزه دې د غوټۍ د زنبق ده

چې چاپير ترې نور ګلونه د ګلزار دي

. 

بناګوش دې نسترن دی غوړېدلی

د چنبې تر ګلو به دواړه رخسار دي

. 

سپينه خوله که دې غنچې سره نسبت کړم

د غنچې غوټۍ کله شکربار دي

.

دواړه سرې شونډې دې ښې دي تر سرو لعلو

سپين غاښونه بې بها دُر شهوار دي

.

ښايسته زنه دې سيب د سمرقند ده

چې خواږه يې تر نباتو نه بسيار دي

. 

صراحي د سپينو زرو، سپينه غاړه

سيم آسا اوږې دې هم په دغه شمار دي

. 

واړه تن دې د حلب تر ښيښې صاف دی

چې رازونه دې درون ترې نمودار دي

.

سپنې لېچې دې مصرۍ تُورې تېرې کړې

چې خونونه يې په غاړه سل هزار دي

.

د ياقوتو نګينې، د سرهٔ نوکونه

ځای په ځای دې په اوږدو ګوتو کتار دي

. 

چې مې ستا د تيو ښه ننداره وکړه

هغه کلک په لذت ډک خواږه انار دي

. 

د نامه غوټۍ دې ګل دی د ګلابو

کیڼ او ښې د ګلو پاڼې پرې انبار دي

. 

د نامه دې کښته دم وهلای نه شم

هم هغو زده چې خبر په دا اسرار دي

. 

د پنډيو تر صفت دې نه رسېږم

ولې سپينې په سپينوالي تر چوتار دي

.

سپینې پښې دې د زنيق ګلو پاڼې 

د پښو ګوتې دې کلۍ د انار دي

.

تمام قد دې په مثال د سبر ونه

ولې سم ولاړ دې عين د چنار دي

. 

سر ترپايه ننداره يې ځان دې جوړ کړ

تر تا ځار واړه راڼۍ د هندوبار دي

.

ستا مثال په هندوبار کې راښکاره شو

د لوبيا دانه يوه، مټر خروار دي

.

د ټيکۍ د دُکدکۍ لعل او دُر دې

ګوښي ګوښي واړه کيل وته تيار دي

.

ته خو ډېر مهر کوې، عمر دې ډېر شه

د خوشحال خټک دې تش مهر پکار دي

.

خوشحال بابا

Khushal Khattak Baba Pashto Ghazal Describing Beauty Of His Beloved. Pashto Poetry, Pashto Classic Ghazal Poetry By Khushal Baba, Khushal Khattak Baba Kalam, Da Khushal Khan Khattak Shayeri, Pukhto Shayeri, Pukhto Kalam, Pashto Times, Pashto Pedia, Pashto Info, Pashto World, Pashto Learning, Pashto Language.