Bacha Khan Aw Da Khalak. Fawad Chaudhry About Bacha Khan. By Sajjid Takkar.
باچاخان او دا خلق...
کۀ د دې ملک نصاب ګونګ نۀ وے نو نن به فواد چوهدري دا خبره نۀ کوله. دۀ ته ګناه نشته. دا غريب د څۀ نه خبر دے. دا خو يو ابن الوقت سړے دے. پرون د چا سره ؤ، نن د چا سره دے او سبا خداے خبر چې به د چا نعره وهي. مسئله دا ده چې غږېدلے پۀ تاريخ دے خو د تاريخ نه ناخبره دے. نامه د باچاخان اخلي خو باچا خان نۀ پېژني.
دۀ نه تپوس کول پکار دي چې مسلم ليګ پۀ ۱۹۳۰ کښې خدائي خدمتګارو ته لاس ولې نۀ ؤ ورکړے؟ ولې ئې د پښتنو قيادت پېرنګي ته پۀ مېدان پرېښے ؤ؟ ولې دا پښتانۀ کافران وو څۀ؟ څۀ خبره وه چې جرګه پۀ مسلم ليګ پسې لاړه او هغوي تش لاس راولېږله؟؟؟
دۀ نه پوښتنه کول پکار دي چې کله پاکستان جوړ شو او د باچاخان د محمد علي جناح صېب سره کراچۍ کښې ملاقات وشو نو څۀ خبرې شوې وې د دواړو مېنځ کښې. باچاخان وئيلي وو چې مونږ د تقسيم خلاف وو خو چې اوس دا ملک جوړ شو نو ورورولي به کوو او د دې ملک خدمت به کوو. جناح صېب د دې ملاقات پۀ رڼا کښې ژمنه کړې وه چې پۀ دوره کښې به د خدائي خدمتګارو مرکز "مرکز عاليه، سر درياب" ته ځي. خو چې پېښور ته راغے نو دلته چې کوم مسلم ليګيان وو هغوي دغه ځاے ته ورتلو ته پرې نۀ ښودو. ولې؟ ځکه چې دغه خودغرضه او چاپلوسه مسلم ليګيان پوهه وو کۀ دوي سره جوړ شول نو د خدائي خدمتګارو مخه چا نۀ شوه نيولې نو سخت مخالفت ئې وکړو. باچا خان هر چا ته د ورورولۍ لاس غځولے ؤ تر څو د خپلو پښتنو خدمت وکړي خو چا تسليم کولو نه ځکه چې دغه خلق وېرېدل چې کۀ خدائي خدمتګارو ته مو مخه ورکړه نو بيا ورته د ټينګې نۀ يو. ځکه نو د پروپېنګډو، دروغو او الزاماتو پۀ بنياد ئې د تحريک خلاف هر ممکنه هڅه وکړه او ښۀ پۀ وس ئې د دغه تحريک خلاف خپله ذمه واري پوره کړه.
باچاخان خپله يو لوے تاريخ دے خو لۀ بده مرغه قام ئې لا تر اوسه لوستے نۀ دے. باچاخان پۀ مثال د خپلو غرونو دے خو لا قام ئې ترې خبر نۀ دے.
بايد پښتانۀ خپل اتلان ولولي. بيا کۀ څوک داسې بې بنياده خبره کوي نو کم ازم کم چې خبر خو يئ کنه. خپل تاريخ ولولئ چې کم از کم څوک مو تېرباسلے خو نۀ شي کنه.
باچاخان خو امن ؤ، مينه وه، انسانيت ؤ، رښتيا ؤ، ورورولي وه، قامولي وه، عدم تشدد ؤ او د روغې سولې علمبردار ؤ.
فواد چوهدري دې هر څۀ وائي ځکه چې د سپکو خلقو نه د درنو خبرو طمع لرل ناپوهي ده خو بايد پښتانۀ کم ازم کم خپل باچاخان وپېژني.
پۀ مينه او درنښت
ساجد ټکر
Comments
Post a Comment
Thanks for visiting Pashto Times. Hope you visit us again and share our articles on social media with your friends.