Hamza Baba VS Jaffar Achakzai. Man And God By Muhammad Jaffar Achakzai. Pashto Book God And Man.
"محمد جعفر اڅکزی"
۱۰/۸/۷۶
حمزه صېب پۀ خپل اخري خط کښې زما د یو سوال پۀ جواب کښې لیکي "چې پۀ دنیا انسانان نۀ وے, امن و امان او قلاره قلاري به وے "
دلته سوال پېدا کیږي, چې څنګه امن؟ د چا دپاره امن؟
د امن و امان, نیکي او بدي, ښۀ او بد دا هر څۀ تعبیرونه چې د انسانانو دپاره او د انسانانو پۀ حقله کیږي, انسانان ئې کوي. نۀ چې یو بل مخلوق. بیا چې انسانان نۀ وے نو هیڅ به نۀ وو. هیڅ به نه وے لکه د سپوږمۍ داسې حالت به وے؟ د سپوږمۍ و دنیا ته د امن امان دنیا وئېل به کوم انسان تسلیم کړي
حمزه صېب یو بل ځاے د کشش ثقل پۀ مثال زما دعوی رد کړې ده. حال دا چې دۀ پۀ خپل وجود او شهود نومې کتاب کښې چې ما تر زېر نظر مباحثې وروستو ولوست, د کشش ثقل دعوی څخه انکار کړے دے.
زۀ ددۀ پۀ انکار اعتراض نۀ کوم. هر انسان د خپل رائے د اظهار حق لري. البته دا ضرور وایم چې یو ځاے د یو شي حقیقت څخه انکار کول او بیا بل ځاے هم هغه حقیقت پۀ طور دلیل وړاندې کول د ذهني تضاد واضح دلیل دے. چې وجود او شهود نومې کتاب ددې دلیل ښکاره ثبوت دے
زۀ خپله دا دعوی بیا تکراروم. چې مسلمان عالم د عمر پۀ اخري دور کښې همېشه د علم پۀ مقابله کښې د عقیدې څخه شکست خوړلے دے. زېر نظر مباحثه کښې حمزه صېب د خپل ټول علمي محصولاتو پۀ نتیجه کښې د وجود پۀ لحاظ بالاخر هغه خداے تسلیم کړے دے کوم چې د عقیدې پۀ بنیاد هر عام انسان او مسلمان مني. او بیا د خپل دې علمي شکست او طبعي معذورۍ پرده پوشي پۀ دې ډول الفاظو کوي چې " ما او خداے سره پېدا کړه زما ذهن اوس د اضداد نه پاک دے"
خالانکه کوم شے چې حاصل شي د هغې اهمیت ختم شي او خداے یقینا دومره کوشنے ذات نۀ دے چې پۀ دومره اسانۍ د هغۀ اصلیت معلوم شي. انسان چې تر څو خپل خپل ځان نه وي پېژندلے, د خداے د وجود هر تصور به ئې غلط وي
علم وعقیده دوه بیل شیان دي عقیده د مذهب سره او علم د عقل سره تعلق لري. مذهب بې عقیدې او علم بغېر له عقل داسې دے لکه بې مغزه بادام
علم وعقل مترقي او مذهب وعقیده غېر مترقی شیان دي. مذهب وعقیده لکه څنګه چې پخوا وو هم هغه شان اوس دي. ختم به شي مګر ترقي به ونۀ کړي. مګر علم وعقل نه د پخوا پۀ شان اوس دي او نه به د اوس پۀ شان بیا وي.
حمزه صېب د خپل هر قسمه علمي تحصیلاتو باوجود د پیر مرید دے. دا عقیده ده, کۀ پیرۍ او مریدۍ د علم سره تعلق لرلے نو سارتر, نیتشے یا داسې ټول ماده پرست عالمانو به ډېر د وخته لا دا مختصره او موثره لار اختیار کړے وے.
د روژه ماتي دپاره پۀ لحاظ د صحت او توانایۍ د پخوا پۀ مقابله کښې نن سبا ډېر شیرین, خوش ذائقه او مقوي روژه ماتونه ایجاد شوي, یا دریافت شوي دي. خو مونږ بیا هم روژه پۀ خرما ماتولو ته ترجیح ورکوو. پۀ دې چې دا زمونږ عقیده ده. چې روژه پۀ خرما ماتول سنت هم دے او ثواب هم
مختصر دا چې پۀ پټو سترګو تلل عقیده ده او پۀ روڼو سترګو تلل علم, فرق ظاهر دے
د علم وعقیدې پۀ تفصیل کښې زۀ پۀ دې لاړم.چې زما او د حمزه تر مابېن د خداے د وجود پۀ نظریه کښې بنیادي اختلاف هم دغه ټکے دے. چې دے علم وعقیده یو شے ګڼي او زۀ دا دوه بېل بېل شیان.
هیله کوم چې لوستوال به د خداے د وجود پۀ حقله د علم وعقیدې تر مابېن د فرق پة حقیقت ځان پوهولو باید حقائق وسنجوي. کوم چې د عقائدو پۀ محور ګرځي. هغۀ ته به دا مباحثه یقینا عجیبه غوندې ښکاره شي خو کۀ د عقائدو د قېد څخه یوه شېبه ذهن ازاد کړے شي او عقلا ورته ځېر شي. نو باور لرم چې د پښتو پۀ ټریچر کښې به دا مباحثه چې د نوعیت پۀ لحاظ اولینه مباحثه ده. پۀ علمي لحاظ د یو نوي باب اضافه وکړي.
انسان او خداے"
مباحثین: حمزه شینواري, جعفر اڅکزے
Comments
Post a Comment
Thanks for visiting Pashto Times. Hope you visit us again and share our articles on social media with your friends.