King Zahir Shah, Last Afghan King In Rome In Exile. How King Lived In Rome. Dawood Afghan Blogs.
How King Zahir Shah Lived In Rome?.
په جلا وطنۍ کې د ملت بابا ژوند او پردی کور:
میرویس میاخېل چې په ۲۰۰۲ کال کې روم ته د اعلیحضرت ليدو ته ورغلی او راپور یې بي بي سي خپور کړی یوه برخه يې په دې ډول ده:
په يوه زاړه انگريزي جاگوار موټر کې چې زما په گومان به د لسو کلو و، سپاره شو. وروسته راته څرگنده شوه چې همدا زوړ موټر زموږ د پخواني پاچا و.
مصطفى ظاهر راووت، روغبړ مو سره وکړ او ددوى کور ته د ننوتو بلنه يې راکړه. کور د کوڅې د نورو کورنو نه کوم توپير نه لاره. مصطفى ظاهر د ميلمنو کوټى ته بوتلو او موږ ته يي پر يوه ډېر ساده کوچ د ناستې بلنه راکړه.
ملت بابا په اخر کې خپل یوه سکه د ډالۍ په توګه راکړه. ۲۰۰۷/۲۴/جولای
مصطفی ظاهر ما ته په یوې لیدنې کې وویل، چې هغوی په کډوالۍ کې له سخت تنګلاسي سره مخ شول، بیا د سعودي پاچا ملک فیصل د هغوی د کور د لګښت لپاره د هغوی لاسنیوی وکړ او هره میاشت یې د هغوی لويې کورنۍ ته ۱۳۰۰ ډالره لېږل. پيسې به یې هر څلور میشاتې وروسته ورلېږلې او دوی به په هغه خپل ژوند تېراوه.
همدارنګه کولای شو، د جلاوطنۍ په دوره د ملت بابا ژوند له لاندې کیسې څخه، چې ښاغلي الله نور سېلاب رانقل کړې ده، د ټولو منفي تبلیغاتو خلاف، چې د هغه پر ضد کېدل، ښه معلوم کړو.
ډاکټر عبدالرحیم شیرزوی، د افغانستان د بهرنیو چارو د وزارت پخواني معین او په څو هيوادونو کي سفیر یوه ورځ داسې کیسه وکړه!
کله چې په ایران کې د امام خمیني په مشرۍ ملایان حکومت ته ورسیدل نو په لومړۍ اونۍ کې د نوي حکومت د بهرنیو چارو د وزارت مرستیال ایټالیې ته ولاړ او راسا د اعلیحضرت محمد ظاهر شاه بابا کور ته، چې د ایران د پاچا لخوا ورته د اوسېدو لپاره ورکړل شوی و، ورغی. ایراني معین ورته وویل، چې
حضور این خانه به خون ملت ایران خریده شده شما لطفا خانه را تخلیه کنید!!!
زموږ پخواني پاچا یوه اونۍ وخت ور څخه وغوښت چې ځان ته کور ولټوي او خپل کالي او د کور سامان ور انتقال کړي.
ښاغلی معین ورته یوه اونۍ پخپله په روم کې په هوټل کې منتظر پاتې شو، چی کور له اعلیحضرت څخه تسلیم کړي.
د اعلیحضرت زامن او لمسيان په روم کې په یو مناسب اپارتمان پسې یو خوا بل خوا ګرځېدل او ایراني معین یې ننداره کوله. درې، څلور ورځې وروسته شهزادګانو یو اپارتمان پيدا کړ او د کور د کالو په ور لېږدولو یې پيل وکړ. کله چې ایرانی معین پوه شو، چې دوی په کرایه یو ډېر کوچنی اپارتمان ونیو او نیم سامان یی ورانتقال کړ، نو راغی او اعلیحضرت سره یی ولیدل او وې ویل چې:
حضور! تاسې څلوېښت کاله د افغانستان پاچا واست، په روم کې یو کور نلرئ؟
ما خو فکر کولو چې تاسې عربي ټایپ یو ملک یاست؟
ملک په عربي کی پاچا ته ویل کیږي!
لیکن تاسې خو افغان ټايپ ملک وختی، چې کرایه دار ته ویل کیږي؟
دا څرنګه درویشانه پاچاهي دي کړې، چې یو کور بیرون نلرئ؟
زموږ رضا شاه پهلوی خو ټوله دولتي سرمایه په ډېر وحشت په شخصي هوس لګوله.
همدا رنګه عربي شیخانو او پاچاهانو ټول دولتي عایدات د خپل هوس پوره کولو په خاطر مصرفول.
تاسې ولې داسې درویشانه پاچاهي کړې؟
اعلیحضرت ورته موسکی شو او وې ویل، چې زموږ پلانونه د ملت د ازادۍ ساتنې لپاره وه!
مونږ نه د شرق په بلاک کې ننوتو او نه د غرب. مونږ خپله ازادي وساتله لیکن هیواد مو وروسته پاته شو.
مونږ کوښښ وکړ، چې خپل هيواد د خپلو عایداتو له لارې پر مخ بوځو او د استعمارګرو مخه ونیسو.
مونږ به چې کله د غربي کوم هیواد نه مرسته وغوښته، نو شورویانو به یی مخه ډب کړه، که به مو له شورویانو وغوښتنه غربیانو به یې مخه نیوله. د دوو ډيرو خبیثو ګاونډيانو چې شمال کې شوروي او په جنوب کې پاکستان وو، په منځ کې راګیر و.
ایراني معین ورته وویل، چې حضور! مونږ خو ټولو پاچاهانو ته د لوټمارانو په سترګه کتل. اوس چې په حقیقت پوه شوم، نو ډېره بخښنه غواړم او بیرته مو کالي راوړئ، همدې کور ته تر څو چې په ایران کې اسلامي نظام وي دا کور ستاسو په اختیار کې دی.
همدارنګه کرستینالیمب په خپله اثر «افغانستان او پر پوله یې جګړه» کې د ملت بابا د تنګلاسې ژوند او د هغوی د تنګ کور یادونه کړې ده، چې ټوله شاهي کورنۍ، چې شمېر ۲۴ تنو ته رسېده، غالبا په دریو وړو کوټو کې اوسېدل.
نو د ملت بابا د جلاوطنۍ حالت، پردي کور او غریبي او بيا پر وړاندې لومړی د کمونیستانو، پاکستان او ځينو مجاهدینو لخوا پوچ تبلیغات، چې ګواکي هغه د دولت ټوله خزانه چور کړې او له ځان سره روم ته وړې ده، هلته یې ځانته پرې لوسک او مزین کور او آرام ژوند جوړ کړی دی. ښه پرتله کولای شي. هغه چې له لسیزو جلاوطنۍ وروسته هيواد ته راستون شو، نو د ملي پشتوانې د پټولو ځای یې حکومت تر وښود. انور الحق احدي هغه مهال د بي بي سي سره په یوې مرکې کې وویل: چې د ملت بابا لخوا د راښوول شوې ملي پشتوانې ۱۷،۵ ټنه سره زره مو دباندې راوایستل او شپږ میاشتې مو د هغه پر قلفونو کار وکړ، تر څو یاده ملي خزانه مو راوایستل. ما د خپل استاد له خولې اورېدلي وه، چې د هيواد د پولي واحد ارزښت هم د ملي پشتوانې پر ډېروالې تړلی دی. څومره چې د هيواد د خزانې سره زر زیات وي، هغومره به یې پولي ارزښت هم لوړ وي.
🖋 داود افغان
••• ═══ ༻✿༺═══ •••
Courtesy.
mundigak.com
,
Comments
Post a Comment
Thanks for visiting Pashto Times. Hope you visit us again and share our articles on social media with your friends.