Letters And Recorded Cassettes. Khatoona Aw Casatona.

Letters And Recorded Cassettes. Khatoona Aw Casatona.

خطونه او کېسټونه

ډاکټر محمد علي ديناخېل

پوسټ ډاک فېلو

هومبولډ يونيورسټي (برلن) جرمني

نېته: 10م جولائي 2022

زۀ چې په درېم ټولګي (کلاس) کښې ووم نو زما پلار خط راولېږلو او ما په وړومبي ځل ولوستلو ۔ زما نيکه ډېر زيات خوشحاله شۀ چې وس په بل چا د خط لوستلو ضرورت پاتې نۀ شۀ ۔ بيا به خپلو خپلوانو ته خطونه هم ما ليکل ۔ د خط په اخر کښې به مو په اردو کښې وليکل چې خط لکهنے والے کي طرف سے خط پړهنے والے کو سلام ۔ يعني د خط ليکونکي د طرف نه دې خط لوستونکي ته سلام وي 

کله چې په پينځم جماعت کښې ووم نو يو کلي وال مو په مسافرۍ کښې وۀ يو ځل مې د هغه د پلار د طرف نه هغه ته خط اوليکلو ۔ بيا هغه خپل پلار ته وئيلي وو چې کله هم ماته خط رالېږئ نو په دۀ به يي ليکئ ۔ وجه دا وه چې هغه مشر سړے به ما پسې راغے وئېل راشه زمونږ کور ته او مونږ له خط اوليکه ۔ زۀ چې به لاړم نو د هغه هلک مور ، پلار او کور واله به راته خبرې کولې او ما به ليکلې 

د لسو مخونو نه خو ما چرته د هغوي کم خط نۀ وۀ ليکلې ۔ دوه ځله به مي پکښې چائے وڅښله ۔ پلار به يې خبرې اوکړې بيا به يې د هغه هلک مور ته وئېل هغې به خبرې اوکړې ۔ د هغه دوه ښځې وې هغوي ته بۀ هم د هغه پلار ووئېل چې که تاسو څه وئېل غواړئ نو ووايئ خو هغوي به وئېل زمونږ د طرف نه ورته صرف سلام اوليکه ۔ بيا چې به مې دا خط اوليکلو نو بيا به هغوي ټول  کېښناستل او ما به ټول خط ولوستلو ۔

په کلي کښې به يوه بله زنانه راتله هغې له به مې د هغې ځوي ته خطونه ليکل ۔ ځوي ته به ډېره قارېدله ۔ کله به يې وئېل چې داسې اوليکه چې مور صاحبه ډېره قاريږي (ځان ته به يې پخپله مور صاحبه وئېله) ۔

هغې له به مې هم ډېر اوږده خطونه ليکل ۔ بيا ډېر تنګ شوم ۔ هغې به خبرې اوکړې هغه ضروري خبرې به مې اوليکلې او نورې به مې نۀ ليکلې ۔ يوه ورځ مې دغه شان لنډ خط اوليکلو، هغې ووئېل وس دا ما ته ووايه ما هغه شان مختصر ووئېل ۔ خفه شوه وئېل تا خو زما د غصې او د قارېدلو هغه خبرې نۀ دي ليکلې ۔ بيا مې چل زده کړو ۔ خط به مې مختصر اوليکلو او چې بيا به مې ورته لوستلو نو د هغې هغه ټولې خبرې به مې ورته واورولې 

يوه ورځ يو کلي وال راغے وئېل زما ورور ته خط اوليکه ۔ خط مې د بدقسمتۍ نه په اردو کښې شروع کړو ۔ چې نيمې ته ورسېدم وئېل دا ورته اوليکه چې " هغه چيرګۍ جوټه سسته شوې ده ۔"

 حيران يې کړم چې اے خدايه دا به په اردو کښې څنګه ليکم ۔ يوه شيبه مې قلم په خوله کښې نيولے وۀ ۔ يوه مسئله دا هم وه چې کله به ليکونکي لږ سوچ کولو نو بيا به خلقو وئېل چې خط نۀ شي ليکلے او ټوله ورځ سوچونه کوي ۔ بس سمدستي مې فيصله اوکړه چې دا باقي خط به په پښتو کښې ليکم ۔ او هم دغسې مې اوکړه ۔ (خدائے شته چې د دې خبرې به پينځويشت ديرش کلونه شوي وي خو دا خبره مې په اردو کښې اوس هم زده نۀ کړه) ۔

مشر ترۀ مې په سعودي عرب کښې وۀ کېسټونه به مو ورته لېږل او هغه به هم کېسټ رالېږلو ۔ ټول خاندان يو ځائے اوسېدلو۔ چې کېسټ به راغے ماسخوتن به ورته کېښناستلو ټولو به واورېدلو ۔ که چرته د چا ماشوم نوم به هم هېر شوے وۀ نو هغه به هم ګيلې شروع کړې 

 بله به دا هم مشکله وه چې چا به وئېل زما نوم يې د دې بل نه ولې وروستو واخستلو ۔ چا به وئېل زۀ خو يې بس د نورو وړو سره په سېل کښې يو ځائے ياد کړم او زما نوم يې ځانله بيل وا نۀ خستو ۔ د کېسټ ډکونکي د پاره د دې رتبو مرتبو خيال ساتل ډېر ګران وو خو بيا به يې هم د دې ډېر خيال ساتلو ۔ افسوس چې هغه کېسټونه زمونږ په کورونو کښې محفوظ پاتې نۀ شو ۔ کاش که دغه موجود وې نو نن به مو د خپل نيا نيکونو، او د نورو مړو رشته دارانو خبرې اورېدلې ۔

 دا خبرې زمونږ د تاريخ، کلتور يوه اهمه برخه ده ۔ دا وخت زۀ په جرمني کښې د اول جنګ عظيم د پښتنو قيديانو په هغه خبرو څېړنه کومه، کومې خبرې چې د وړومبي نړيوال جنګ (1914-1919 ) په دوران کښې جرمنيانو د دوي نه ريکارډ کړي دي ۔ پکار دا ده چې مونږه هم د خپلو مشرانو خبرې، خطونه ، کېسټونه د ځان سره محفوظ اوساتو ۔

عکس مې د نيکۀ دے (دراني خان (1916-1995)

Tags And Keywords..

Letters And Recorded Cassettes. Khatoona Aw Casatona. Old Gold Days, Memories Of Writing And Sending Letters. Recording Cassettes For Relatives. Pashto Nostelgia, Yadoona, Zarha Yadona. Pashto Pedia Pashto Times, Pashto Letters.