Pandemic By Khushal Baba. Da Ghawas Da Kaal Waba.
خوشال خټک او د(غواص کال) د وباءقصیده
------------------------------------------
لطیف یاد
د غواص دکال وباء د۱۰۹۷ هجري کال وبا وه چې په پښتونخوااو سیمه کې رامینځ ته شوې وه .تر هغې دمخه په ۱۰۸۸ هجري کال کې په سیمې او پښتونخواکې یوه سخته کا ختي ( قحطي )راغلې وه چې خوشال خان خټک پخپلو اشعاروکې ددغې قحطۍ او ددغې وبا ء دواړو یادونه کړې ده.
دغواص دکال وباء ځکه ورته وایي چې کله غواص دابجد په حساب تجزیه کړو نو لا ندیني کال ترې جوړیږي. په دې ډول :
غ= ۱۰۰۰
و=۶
ا=۱
ص=۹۰
دا ټول چې سره جمعه شي نو ۱۰۹۷هجري ترې جوړیږي.
دخوشال بابا دوباء دکال قصیده
-------------------------
دغواص دکال وبا ء
خدای یې مه راوله بیا
اکوړخیل(*) مې پکې ومړل
لوی هلک ، مرد ونساء
بخت ناک خان (**)مې پکې ومړ
موریې بوتله هم قضا ء
یو هلک یې و راپاتې
ورپسې شو زرفنا
چا ته ژاړم له دې غمه
سود مې کوم دی دژړا
لورپه لور په دالمبو کې
عالم پروت په و اویلا
تر دکنه تر کا بله
راخوره شوه دابلا
په لکونو عالم ومړ
چې ښهرونه شول صحرا
اول قحط بیا وباءوه
په هرلوري وه غوغا
سر فراز دسعا دت و
ښه لمسی مې و زیبا
هم حا فظ ددرست قرآن و
هم په خط و بې همتا
دښکارسپي یې وساتلي
لیونی شو بې غو غا
لاس یې وروړبې خبره
چې ګاڼه یې خپل آشنا
دی یې وچیچه په لاسو
لا علاج شو لا دوا
په داکال دماقضا کړو
په ارمان ارمان جدا
کال حصغ شو وبا لاړه
هم عسرت کړه راته شا
بارانونه دې وریږي
وداني شوه په دنیا
نه تل غم وي نه ښادي وي
وار په وار وي هغه دا
په هرحال شکر بایده دي
چې بدتره نه شي لا
---------
حصغ
ح= ۸
ص=۹۰
غ= ۱۰۰۰
چې که داټول سره جمعه شي نو ۱۰۹۸ هجري کیږي چې داوباء بیا په همدې کال ختمه شوه او پای ته ورسیدله.
--------------------
ما خذونه
۱- دخوشال کلیات ۹۵۶ مخ
۲- خوشال خان خټک ، دارواښاد دوست محمد خان کامل لیکنه ، دلطیف یاد ژباړه ۵۰۸-۵۰۹ مخونه
(*)اکوړخیل = دخوشال بابا دنیکه ملک اکوړې ټبراو اولاده
(**)بخت ناک خان دخوشال بابازوی و.
Comments
Post a Comment
Thanks for visiting Pashto Times. Hope you visit us again and share our articles on social media with your friends.