His Master Voice. Story Of gramophone's Dog. Pashto Pedia

 دګرامافون سپی

ډيرو هیوادوالو ته به په یاد وي چې په پخوانیو وختونو کې چې لا ټیپ ریکارډرونه نه وو جوړشوي نو خلکو به په ګرامافون (gramophone) سندرې اوریدلې. زماښه په یاد دي چې زموږ یوه خپلوان له نن نه شپږ پنځوس کلونه وړاندې یو ګرامافون درلود هغه به موږ ته پرې سندرې غږولې. عامو خلکو به ګرامافون ته (ګرافون) ويل او د سندرو ریکارډونه به یې په ګرامافون ( ګرافون) غږول.

له نن نه ۱۲۰ کلونه وړاندې په انګلینډ کې دموسیقۍ دخپرولو یوې کمپنۍ یو لیبل جوړ کړ چې( His Master's Voice‎) یې ورته وایه مخفف یالنډیزیې (HMV)و. د دې کمپنۍ دلیبل نوم چې ( دخپل خاوند غږ) نومید دسپي هغه انځورته اشاره وه چې پر ګرامافون کښل شوی و او د خپلې کمپنۍ د خاوند دثبت شوې (ریکارډشوې) سندرې یې خپرولې.

وروسته بیا نوموړې کمپنۍ دګرامافون دهمدې انځور شوي سپي مجسمې جوړې کړي اوهغو سندرو جوړوونکو ته به یې دجایزې په توګه ورکولې چې ددوی دیوې سندرې (سل زره ) ریکارډونه به یې خرڅ شوي وو او کمپنۍ به پکې ښه ډیره ګټه کړې وه.

زموږ دکلي حسن کاکا چې له مړینې یې اوس ډیر کلونه تیر شوي دي نو کله به چې زموږ دکلي کوم ماشوم ته په غوسه شو نو ورته به یې ویل : وا هلکه دګرافون له سپي نه مې هم له تا څخه ډیر بد راځې.

استاد لطيف ياد