د عبدالباری جهانی غزل

زاهده تا مي د تقوا په نوم نشې ماتي کړې

ما دي د حورو د خوبونو سلسلې ماتي کړې

ته د دوزخ له وهمه غلی کرۍ شپه ژړیدې

ما د کوثر په مستو هیلو کي پیالې ماتي کړې

ته یې له قهره له خلوته راوتلای نه سې

ما د کرم په طمع زر ځله توبې ماتي کړې

تا خیر و شر ته د حساب هتکړۍ واخستلې

ما د جنون په نوم د عقل زولنې ماتي کړې

ته په سجده کي لړزیدلې د حساب له ویري

ما بې حسابه دروازې د میخانې ماتي کړې

څوک یې د میني له زندانه غرغړې ته وزي

چا یې د قهر له هیبته پنجرې ماتي کړې

چا د یوې جلوې په مینه ځوانۍ نذر کړلې

چا په تصویر کي له نقاش سره وعدې ماتي کړې

د "جهاني" محفل ته مه راوړه اغزني کیسې

موږ لیونیو په اورونو کي لمبې ماتي کړې

Zahida ta mi da taqwa pa noom tobi mati kray.

Pashto lyrics