نوے غزل
امجد شهزاد
ما ته نزدے به اخر بل څوک وي؟
ستا نه بغېر به زماخپل څوک وي؟
وائي ځه چرته به پاګل څوک وي
چې دَ دې خلکو نه بدل څوک وي
زما دَ قام دَ شعور تګ داسې دے
لکه پۀ دواړو پښو چې شل څوک وي
دا خلک څنګه پۀ دې ښار کښې ووسي
داسې بلد به دَ ځنګل څوک وي؟
دغه لټون يې بې ثمره نۀ وي
چې دَ رښتياؤ پۀ تکل څوک وي
چې غلي غلي محفلونه شي ټول
نو پۀ يارانو کښې درغل څوک وي
يو دَ خپل فکر خپل نظر نه سېوا
دَ ژوند پۀ لاره دَ چا مل څوک وي
دَ دسمبر دَ اوږدو شپو نه قربان
خو چې اودۀ دې پۀ څنګل څوک وي
مونږ خو ليدلے خنده رويه امجد
دا چې غمژن دے دا به بل څوک وي
دسمبر ۲۰۱۲ـ کلے
Comments
Post a Comment
Thanks for visiting Pashto Times. Hope you visit us again and share our articles on social media with your friends.