شاعر: غني خان
Poetry By Ghani Khan.
ربه
Poem. Rabba.
ـــــــــــــــــــــــــــــــــــــــــــــــــــــــــــــــــــــــــــــــــــــــ
**اې په خېشت ميينه، جوړوونکی د ګلاب، ربه!**
**ستا ښکلې دنيا شوه د څاروي او د قصاب، ربه!**
**اې چې د ماشوم سترګې دې جوړې کړې د ګل په شان**
**ړوکی او خوږې خوږې خبرې د بلبل په شان**
**زړه يې پاک د بدو د هر خيال او د ازاره پاک**
**پاک لکه شبنم و، د ګناه او د ازاره پاک**
**تا چې چا ته ټيټ د پرښتو ښکلي سرونه کړل**
**جوړ چې د چا سترګو له تا ستوري او ګلونه کړل**
**تا چې د چا حسن له د خپلو سترګو نور ورکړ**
**تا چې د خپل ځانه چا له مينه او سرور ورکړ**
**هغه محبوبه ستا آدم نه دی آدمخور دی**
**آ ښېسته ګلاب ستا ګلاب نه دی اور دی اور دی**
**هغه ستا د لاس ګل پروت په وينو کې سمسور دی**
**ستا خليفه ربه! آدم نه دی آدمخور دی**
**تا چې چا له جوړه کړه د حسن او ګلزار قصه**
**ورکړه مشغولا له دې د مينې او دلدار قصه**
**تا چې چا له ستوري او سپوږمۍ او ماښام جوړ کړلو**
**تا چه چا له مينه او مستي او خِرام جوړ کړلو**
**سترګې يې دې پټې هغه نن د زهرو پينې څښي**
**ستا په نامه ربه! نن سړی د سړو وينې څښي**
Tags:
Ghani Khan Baba Pashto Poem Rabba Lyrics In Pashto.
Pashto Times, Khan Abdul Ghani Khan Nazam from Latoon. Collection of Ghani Khan Lyrics.
Comments
Post a Comment
Thanks for visiting Pashto Times. Hope you visit us again and share our articles on social media with your friends.