Mula, Pukhto Ghazal Mulla By Izatullah Zwab. Pashto Sheroona.

په ښار کې چې دويم او درېيم واده کوې ملا

د کلي مقتديانو سره څه کوې ملا ؟

پخوا خو به د خان او د ملک دېره کې پروت وې

جرګې لکه چې اوس ورسره نه کوې ملا؟

له دين سره د خلکو ورځ په ورځ مينه زياتېږي

ټينګار به په روژه او په لمانځه کوې ملا!

مېرمنو ته د ږيرو پرېښودو فرمان صادر کړه

سړو سره چې هر څه کوې ښه کوې ملا!

کارونو سر خوړلی دی الله روزي رسان دی

خبره به د خېټې که د زړه کوې ملا ؟

همدغسې دې ټولې خپلې چارې خدای ته سپاره

د خدای پاک ټولې چارې به اوس ته کوې ملا!

ځواب چې ستا دې يو نيم بې منطقه کار ته ګورم

په اوړي کې مې هم کله ساړه کوې ملا !

عزت الله ځواب

Pashto Times