#_کۀ_اواز_نۀ_درځي_نو_اېک_اووهه
د وټساپ پۀ يو ګروپ کښې چا د يوې ويډيو لينک شريک کړے وۀ - ماښام ته نزدې واک له روان ووم - چې پۀ لاره مې دغه لينک کولاو کړۀ - نو د غېر ارادي خندا داسې دوره راباندې راغله - چې تشي مې پۀ لاس کښې ونيول - خپلو غوږونو ته د رسېدلي وښکو نه هله خبر شوم - چې د غېرو غشے يو نرے ماشے مې خلې ته راننوت - لاړې مې تو کړې - خو پۀ حساب ئې پوهه نۀ شوم - چې تېر شۀ او کۀ باهر شۀ - د طنز ، مزاح او اصلاح دومره روانه ، ښکلې ، خوږه او عام فهمه ويډيو د دې نۀ مخکښې زما له نظره ډېره کمه تېره شوے وه - پۀ ويډيو کښې يو پښتون ځوان د ټېلي نار چئيرمېن ته کال کوي - او خپلې ستونځې ورسره شريکوي -
زمونږ ټولنه چې د کومو حالاتو سره مخ ده - نو پۀ هغې کښې هر سړے دا کوشش کوي - چې خپل غم غلط کړي - او د دې له پاره د مزاح لارې لټوي - هغه ويډيوګانې پۀ هغه وخت د انسان غم غلط کړي - خو د ټولنې د اصلاح له پاره پکښې هېڅ نۀ وي - او يا ځينې ويډيوګانې صرف وچ کلک طنزونه وي - چې د بې ځايه اختلاف بوئي ترې راځي - خو د دې ويډيو خاص خبره دا وه - چې د طنز غشي د مزاح پۀ کمان کښې داسې راښکلے شوي وو - چې نېغ پۀ نېغه د انسان زړۀ ته کوزېدل - د انداز بې ساختګي او رواني خو ئې بې شکه چې باکماله وه - او لهجه ئې هم زمونږ د روزمرې او محاورې پۀ کالو ښائسته وه - خو مهمه دا وه چې د تهذيب د لمنې او اخلاقي حدودو نه ئې بيخي تجاوز نۀ وۀ کړے -
د هغې نه پس بيا ما د هغه نورې ويډيوز وکتې - او پۀ ټولو ويډيوز کښې د تنوع او اولسي رنګ سره سره يو زبردست پېغام وۀ - ما ئې لټون شورو کړۀ - خو غالباً د زړۀ نه زړۀ ته لار وي - هغه هم زما پۀ لټون وۀ - او بیا مې ورسره دوه درې ځله خبرې اترې هم اوشوې - کۀ هر څو نن سبا پپ سوشل مېډيا لکه د نمر ځلنده دے - خو ما د يو ډېر خاکساره ، تعليم يافته او بااصوله انسان پۀ توګه وپېژندۀ - کۀ هر څو د هغه هنر زما ستائين ليک ته هېڅ حاجت نۀ لري - خو بيا هم ما دا خپل فرض ګڼل چې خپل حق ادا کړم - او دا يو څو کرښې د هغه د هنر د نورې ډاډګېرنې له پاره وليکم -
سميع الله خاطر چې د دير د سيمې اووۀ دېرش کلن ځوان دے - پۀ سوشیالوجي او پښتو کښې ئې ماسټرز کړي - د نوائے وقت ، سماء او د سوات د ازادۍ اخبار سره سره ئې پۀ بې شمارو اخبارونو کښې کالمې ليکلي - شاعر هم دے ، ټي وي رپورټنګ ، اېف اېم ریډيو پروګرامونه او بې شماره نورې تنظيمي او غېر تنظيمي هلې ځلې ئې کړي - د يو همه جهت شخصيت پۀ توګه خپل نوم لري - پکار ده چې د پښتو مېن سټريم ميډيا پۀ داسې خلکو ښائسته وے - ولې هلته خو سفارشونه او خپلوۍ دي - او دغه خلک د هنر پۀ مرۍ لکه د خپسو ناست دي - خو شکر دے چې سوشل ميډيا شته - چې د ډنډونو د وېخ ملغلرې ئې وځلولې -
ډاکټر ديدار يوسفزے
Comments
Post a Comment
Thanks for visiting Pashto Times. Hope you visit us again and share our articles on social media with your friends.