Samiullah khatir by Natawan saib

Who is Samiullah khatir

07.08.2021

سمیع الله خاطر صېب

سمېع الله خاطر صېب په ګپ شپ او طنز او مزاح کښې خپل قام اولس ته د مقصدي خبرو او پېغاماتو رسولو د خدماتو یوه ستره نامه ده او دا هم د پښتو ژبې او ادب د پرمختګ یوه وسیله ده۔ ،د قام اولس ضمیر بېدارول او په عوام کښې وخت په وخت اګاهي او بېداري پېدا کول د دوي ستر خدمت دے۔چې دا د هر چا کار نهُ دے۔بلکې د دې سترو خلقو کار دے۔

   که یو طرف ته د دوي په کال سړے د ډېرو پرُ پېچو او ګرانو مسٸلو وېخ ته اورسي نو بل خوا سړے په دې کثیرالمقاصد او معنې خېزو خبرو دې خپل منفرد انداز کښې په خبرو اترو سړے دومره اوخاندوي چې سړے وایي چې کولمې یې راله اوشوکولې۔

په دې مشکل او د ستونځو او مشکلاتو نه په ډک وخت کښې د چا په مخ مسکا رواستل هم یوه صدقه ده۔چې دا د ډېرو کمو خلقو په برخه وي۔

ډېرې داسې خبرې چې د هغې په نورو طریقو اظهار کول یا بیانول دومره اثر نهُ لري لکه څومره چې د موصوف په سنجیده انداز د خبرو اترو او مکالمې په طریقه رسا په زړهُ اثر کونکے انداز دے چې سامع او اورېدونکے  نهُ ستړے کوي او نهُ بور کوي۔خو د دوي په سنجیده انداز کښې ډېر خوږ والے او کشش پروت وي او دومره کشش چې سړي یې پوره وېډیو نهُ وي اورېدلې په نیمه کښې د سړي زړهُ نهُ غواړي چې یې داسې نیمګړې پرېږدي۔

دا هم یو کمال وي چې د معاشرې یوه لویه ستونځه په دومره اسان او زړهُ راښکونکي انداز کښې نهُ یواځې د عوامو په وړاندې راوستے شي بلکې د هغې حل هم په ګپ شپ کښې را اووېستے شي۔

تر څو پورې چې ښاغلے Samiullah khatir ما په دې لږ وخت کښې اولوستو نو ماشاءالله هر فنِ مولا دے۔په کوم سرخط او عنوان وي نو ښهُ پرې په فصاحت او بلاغت سره غږېدے شي۔هر څو که له عمر نه دومره نهُ دے څومره چې علمي او شعوري بلوغت لري۔ 

دا هم د الله له طرفه یوه ستره عطیه وي چې الله چاله د تقریر او چا له د تحریر ملکه ورکړي خو صاحبِ موصوف له یې نه دا دواړه بلکې له دې نه علاوه نور صلاحیتونه هم پرېوانه ورکړي دي۔د ښهُ شاعر،ښهُ مقرر او د ښهُ لیکوال نه علاوه نورې هم ډېرې خوبۍ یې د شخصیت احاطه کوي۔زما خو په ډېرو صفاتو ډېر زیات خوښ دے۔او زهُ یې خپل فخر او ویاړ ګڼم۔

        د سختو نه سخت او د ستغو نه ستغ سرخط مې د دوي په وېډیوګانو کښې ډېر په اسانه او ښکلي انداز کښې واورېدل چې د دغه مسٸلو او شخړو نور په یوه طریقه هم د مینه والو ذهن ته راوستل راته دومره موزون نهُ ښکاري۔او نهُ به د دې ستونځو په نورو طریقو دغسې لار ښودنه وي۔

خپل مقصد ته د رسېدو دپاره ډېر د صبر او تحمل نه کار اخلي که څوک ورته په لاٸیو وېډیو بدګویي کوي هم دوي ورله په ښهُ او احسن طریقه سره داسې جواب ورکړي چې په ټولو اورېدونکو هم ډېر ښهُ اثر اوکړي۔کوم چې د یو ښهُ شخصیت خاصه ده۔

زړهُ مې غواړي چې ډېر زیات لیک پرې اوکړم خو دا یو داسې شخصیت دے چې د ده په دومره زړهُ راښکونکي اندازِبیان که سړے ټوله ورځ لیکل اوکړي خو هم به یې پوره نهُ کړي۔

زما په خیال دا زمونږ د قام او ملت یوه ستره اثاثه ده۔الله دې یې په خپلو نېکو مقاصدو کښې کامیاب او پیاوړے لري۔

کمالات وي څهُ        پراته ځنې سړو کښې

لکه شات چې وي پراته په ځنې خلو کښې

جذبې هم د مینه والو        خپل کړې پارې

برکتونه وي بلها              ځنې جذبو کښې

چې د چا کردار            مجبور زما قلم کړه

داسې خلق پېدا         کیږي نهُ، صدو کښې

د بلبل غوندې       شیرین یې هم ګفتار وي

مخاطب چې وي   اولس ته په پښتو کښې

بس په دې به اکتفا          نور ناتوان اوکړم

ګني ډېرڅهُ مې پراته     دي په مازغو کښې

ستاسو خپل ناتوان