Da Sharabo Jaam. Saud Bangash Pukhto Ghazal

 Saud Bangash Ghazal.

غزل

ساقی  والله  که  پر  اوبو  کېږی

د سرو شرابو جام  پر  څو کېږی؟

الله  الله   ورسره    هم   زاهــده! 

جانان  جانان  هم  پر  تسبو کېږی

یا به  کړې عشق  یا د دنیا  کاروبار

په  دغه  دواړو کښی  به  یو کېږی

ستا اننګو باندې چې اوښکې څاڅي

لکه   باران   پر  سـرو  لمبو   کېږی

زمـوږ   وطن  د   رهبرانـو    ایمـان

که  څوک  يې  اخلي پر پیسو کېږی

په پټه نه، ښه په ښکاره او  پر جار

وینې    سـودا   د   پښتنـو    کېږی

سعوده!  زما په وس کې نه  ده  مینه

که  زه   يې    نه   کومه،   خو  کېږی

سعود بنګښ 

۲۷/۱۱/۲۰۱۳