Ashraf Maftoon Pashto Ghazal
Pukhto Ghazal. Jwandoon Sa De?
غزل
شرف مفتون
ما وې ژوندون جوړ د خدای رحمت دے
خو حقيقت کښې يو لوی زحمت دے
خوب او آرام يې په ما حرام کړل
احساس د مينې سخت مصيبت دے
قائل په ژوند کښې د صداقت يم
تش شرافت خو منافقت دے
څه مې په زړه وي، هغه په خوله وي
څومره بې شرمه زما فطرت دے
په کړۀ وړۀ چې څومره ښائسته دے
هومره بد رنګ يې ذوق او سيرت دے
هسې د شګو پړی غښتل دي
که مساوات دی، زور که شهرت دے
نسل نه، قام نه، مال نه، ملت نه
ښه خو صحت دے، ښه خو سيرت دے
په ډېره مينه، په زياته پوهه
انسان ژور دے، انسان اوچت دے
غل په کښې ساد دی، ساد پکې غل
شمکور قانون دے، کوڼ عدالت دے
د دولت لوږه، د طاقت تنده
تا ته عزت دے، ما ته ذلت دے
درانه چې سپک کړي، سپک چې درانه کړي
تول د قسمت دے، ويش د قدرت دے
په دې بد ذوقه جاهل ماحول کښې
نيستی او لوږه د فن قيمت دے
خوند د سرو شونډو، شرنګ د پينزيبو
زما سرور دے ، زما جنت دے
________________
اشرف مفتون صاحب
سکونډارې _ ۳۹۵,۳۹۶
Pashto Time
Poem. Jwandoon
Poet. Ashraf Maftoon
Language. Pashto
Type. Ghazal
Book. Skundaray, Skondari by Ashraf Maftoon
Comments
Post a Comment
Thanks for visiting Pashto Times. Hope you visit us again and share our articles on social media with your friends.