Hamid Baba Pukhto Ghazal. Pashto Ghazal, Abdul Hamid Momand

 Hamid Baba Pukhto Ghazal. Pashto Ghazal, Abdul Hamid Momand

☆عبدالحميد مومند☆

◇د عبدالحميد مومند ديوان

♡غزل

هسې يم د يار له غمه پۀ ضرور

لکه سوی اورلړونی د تنور

چې هرګز لۀ اوښو وينو نه وچيږي

معلوميږي چې مې سترګې شوې ناسور

هر ساعت شمه راکيښ دار و سنګسار ته

محبت دې قايم مقام کړم د منصور

په دربار مې د بې قدره دلبرانو

نشته قدر د مريی او د مزدور

خدای يې نۀ کا ګنې اچوي شوخ چشم 

هر ساعت په ملايکو کې فتور

زر پۀ زر به يې سياهي د خط پښيمان کا

دا د مخ پۀ روښنايی باندې مغرور

د ريا پۀ زهد مۀ غوليږه زاهده

پۀ کار نۀ راځي د وينځې زوي و لور

څو چې واغوندي حميد° خلعت د وصل

ترې وکاږي يې فلک پۀ وينو سور

○فرهنګ:

●ناسوړ:   نۀ جوړېدونکی پرهر

●ضرور:   مجبوريت، ناکامۍ, احتياج

●مريی:    غلام

●فتور:     ګړبړ، خلل، فساد، فتنه

●خلعت:   خلات, جامې

: Hameed Baba, حميد بابا 

#حميدمومند #پښتوادب #پښتوشاعري