Pa Ranra Bandi Mayan Yam, Kho Tyaro na na Weregam

 Pa Ranra Bandi Mayan Yam, Kho Tyaro na na Weregam. Ghani Baba Pukhto Nazam Lyrics.

Poet. Ghani Khan 

Singer. Sardar Ali Takkar

په رڼا باندی مین یم خو تیارونه نه ویریږم

که پښیمان په ګناه نه یم پری خو نه غوره کیږم

پرون تخم وم نن ګل یم سبا بیا به خاوره کیږم

زه د باد یوه چپه یم په صحرا په باغ تیریږم

کله باد کله باران شی کله اورو کښی وسوسیږم

خو زه ځمه په مخه ځمه که ودریږمه ورکیږم

چی ورپیښ شم په ګلونو کړم ځولی د عطرو ډکه

خورومه یی چاپیره ورته خاندم خوشحالیږم

چی د رنګ په جهان ور شم یو رنګین د بوډی ټال شم

رنګارنګ رنګین جمال کښی سپینه شمع شم ګډیږم

چی د مستو په محفل کی په ساقی او په جام ورشم 

لیونی شانی خمار شم په خوبونو کښی خوریږم

چی جهان تیاره تیاره شی اور شی تندر شی اعزاب شی

زه پښتون د پښتو غر شم نه ویریږم نه لرزیږم

چی د علم په جهان  کی د  هو ښیارو خواه کی کښینم

هم هغوی پوری خندا کړم هم په ځان پوری خندیږم

په فکرونو لیونی شوم په لټون لټون شوم ستړی

خو آخر دغي له راغلم نه پوهیږم نه پو هیږم

خو زه ځمه ځمه ځمه تل روان یمه په مخه

یو مقام ته ور روان یم یو مقام ته به رسیږم

او په لاره چی څه راغله که تیاری وی که رڼا وی

زه رڼا کی یم خوشحاله خو تیارونه نه ویریږم

غنی خان