Pashtun Jirga. What Is Jirga? Pashtun Wali And Jirga. Pashto Blog
By Naeem Azad.
Pashtunwali And Jirga Culture. History Of Jirga
«جرګه»
جرګه د پښتنو ډېر لرغونی/ تاريخي دود دی، چي له لاري يې په هر وخت کي د پښتانه قام توکميزي/ قبايلي او قامي ستونزي/ ستړي او شخړي هواري کړل شوي او هوسا شوي دي
په "جرګه" کي د قام "پښتانه" د بېلا بېلو توکمونو/ قبيلو استازي/ مخور سره يو ځای کېږي او قام د ورپېښو ستونزو/ ستومانيو او ستړو د هوارولو او هوسا کولو لپاره تر سلا او مشوره وروسته يوه لاره ټاکي او هغه ټاکلې لاره بيا د پلي کولو لپاره د قام په وړاندي ږدي
جرګه د پښتانه قام ډېر لرغونی دود دی؛ بلکې دا ويل به بېځايه نه وي، چي جرګه د پښتنو د پارلمان/ پارليمنټ تر ټولو لرغونې بڼه ده او داسي ښکاري، چي اوسنی پارليمان هم د همدې لرغوني دود جرګې پرمختللې بڼه او جرګه يې مونډ/ بنسټ او سرچينه ده
هسي خو د پښتانه قام بېلا بېلي قبيلې هم د خپلو ستونزو او شخړو د هوارولو لپاره پر وړه کچه باندي جرګې تر سره کوي، خو قامي/ قومي جرګه د ټول قام د ستونزو/ ستړو او شخړو د هوارولو او هوسا کولو لپاره په يوه ډېر حساس پړاو کي تر سره کېږي، قامي جرګه د ټول قام استازيتوب تر سره کوي او قامي مخور/ استازي و قام ته د ورپېښو ستونزو په اړه خپله پوهه سره ګډوي/ شريکوي او همداسي په سلا او مشوره سره د قام او ټولني په ګټه وړتيا لرونکې لاره ټاکي
د جرګې تاريخ جوتوي/ ثابتوي، چي پښتانه اولسواکي/ جمهوريت خوښوونکي خلک دي، ولي چي جرګه د ټولنيز فکر د ملاتړ او منلو لاره ده، جرګه له ژوندانه سره د ميني او پرمختګ نخښه ده، جرګه د امن، سولي او د ټولنيز ژوند د ودي/ بقا نخښه ده.
جرګه خپل نرخونه او نورمونه/ اصول لري او دا هم وي، چي له جرګې څخه مخ اړول د قام په وړاندي د سرغړوني په مانا وي، چي ټاکلې ناغه/ تاوان لري، له قامي جرګې څخه مخ نه اړول کېږي، ولي چي د قامي جرګې څخه مخ اړول د پښتونوالي تر چوکاټ د وتلو مانا لري او د ټول قام له کرکي سره ځان مخامخ کول وي.
هر پښتون د پښتونوالي د چوکاټ ساتنه پر ځان پور بولي او د قامي جرګې د استازيتوب ټاکلي لاري ته د منلو سر ټيټوي، د جرګې درناوی و قام ته د ورپېښو ستونزو د هوارولو په لړ کي د وړتيا لرونکي لاري ټاکنه وي، چي د قام مخور مشران يې تر ژورليد او تر خپل منځيو وراشو/ مباحثو وروسته په ډېر پام سره ټاکي او په دې لړ کي پامته داره وي، چي د قام مخور استازيتوب د خپل قام د برم، پت، مذهبي عقايدو، دود دستور او ګټورو فرهنګي او کلتوري ارزښتونو په درناوي او ساتنه د روڼا لوري ته ګام واخلي.
پای دا چي د جرګې برخه وال په ډېر پياوړي هوډ/ اراده سره د پښتونوالي د چوکاټ ساتلو ذهن او زړه لرونکي وي او اولسونه هم د جرګې له خوا د ټاکل شوي لاري په پاللو او ساتلو سره د جرګې باور او درناوی پر ځای ساتي، ځکه پښتانه اولسونو په تاريخ کي باور تر لاسه کړی دی، چي په هر زمان او مکان کي يې په هر ډول حساس پړاو کي قامي ستونزي او ستومانۍ د جرګې له لاري هواري شوي او هوسا شوي دي، کله چي يې هم مخورو په سلا او مشوره تر ژورو وراشو/ مباحثو وروسته د قام د ودانۍ او هوسايني لاره ټاکلې ده، پښتانه اولسونو په لوی زړه پاللې ده.
د ټول پښتون د يووالي، ودانۍ او سوکالۍ په هيله ....
که توفيق د اتفاق پښتانه مومي
زوړ خوشال به دوباره شي په دا ځوان
ستاسو آزاد
Naeem Azad.
Pashto Times Pashto Article About Pashtun Culture Of Jirga.
Pashtun Jirga. What Is Jirga? Pashtun Wali And Jirga. Pashto Blog
By Naeem Azad.
Comments
Post a Comment
Thanks for visiting Pashto Times. Hope you visit us again and share our articles on social media with your friends.