Donkey Letter To Me. A Letter From Donkey. Pashto Letter. Pashto Satire
(د يو خر خط زما په نوم)
نګار صېب سلامونه او نېکې هېلې!
ړومبے خو يو دا سپيناوے پکار دے چې په دې دومره خلکو کښې زه تاته ولې خط ليکم؟ نو د هغې وجه دا ده چې ستا زياتره ملګري (د خط په بل مخ ئې نامې هم ليک دي) زمونږ په شان خويونه لري او ته ورسره ښه ګوزاره کوې، دا دې په مونږ احسان دے. دويم سوال دا پېدا کېږي چې يو خر خط څنګ ليکلے شي نو صېبه تاسو هسې خپلو ډګريانو ته غره نه شئ، د فطرت نه هر څوک ذده کړه کوي خو ستاسو سره ژبه ده نو ځکه کله ځان ته اشرف المخلوقات او کله د کائناتو محور وايي. ګنې تاسو خو د حد درجې کم عقل ئې، چې څوک مو لوټ کړي نو هم هغو ته هارونه اچوئ، دروازې ورته جوړوئ، په صوفو ئې کينوئ او د زنده اباد نعرې ورته وهئ. ويره مو دومره ده چې هر يو په فېس بک ليکلي ئې " ميجر فلانہ کے ساتھ خوش گوار موڈ میں" نو دا اوس چيشے شو. مونږ نه د چا د زنده باد مرده باد چغې وهو او نه ستاسو هومره وېريږو. که څوک مو برناحقه ډېر تنګ کړي نو د لتې "وسله " پکښې هم کاروؤ.
کم عقلي او ويره خو پريږده خپلې بې صبرۍ ته وګورئ چې په تاسو کښی د کوم يو ښځه مړه شي نو د يتيمانو بچو لا اوښکې نه وي وچې او تاسو د بلې ښځې پس پسکې شروع کړئ او چې په نکاح مو زر لاس بر نه شي نو زمونږ په "زنانوؤ" جنسي تېري کوئ او د انسانيت ټپې ورته هم زمزمه کوئ.
ګوره نګار صېب حقه خبره به کوؤ ، ستاسو په کتابونو کښې ليک دي چې غيبت کول د خپل مړ ورور غوښې خوړل دي او تاسو ئې خورئ، سود د الله تعالی سره جنګ دے، تاسو دغه جنګ له ښه زور ورکړې او بيا هم د جماعت نه راروان ئې وئ او په شنو ګيرو کښې ږمنځې وهئ. مونږ نه خپل ورور غيبت کوؤ، نه ئې حق خورو او نه مو د خپل خالق سره د جنګ سوچ هم چرته کړے دے
چې خفه نه شئ خو لږ مو په خپل شعور دويم نظر وکړئ، زمرے چې مو ماتوي نو تاسو ته ګران دے او خر مو چې خدمت کوي نو تاسو پورې ټوقې کوئ. ګر چې زمونږ خوراک تش په نوم دے، د خصي کولو په نوم مو د فطرت د راکړي حق نه هم محرومه کړئ خو مونږ بيا هم تاسو ته تيار تابعدار ولاړ يو.
نو صېبه غرض مې دا کولو چې زمونږ په حواله نور ددې سپکو سپورو نه واوړئ، زمونږ د خدماتو اعتراف وکړئ. لږ په خپل دوست او دښمن کښې توپير وکړئ. دا کومه وېره او غلامانه ذهنيت چې ستاسو د نفسياتو برخه جوړه شوې او د هر تش په نوم مشر مريدي مو پېل کړې، ددې نه قلار شئ ، خپل اتل او درغل وپېژنئ او په حقيقي معنو کښې د اشرف المخلوقات په شان ژوند تېر کړئ.
ستاسو تابعدار خر
خرو محله، تحصيل وضلع خر اباد
نېټه: ۶ جنوري ۲۰۲۲
Anwar Negaar Utmankhel.
Comments
Post a Comment
Thanks for visiting Pashto Times. Hope you visit us again and share our articles on social media with your friends.