Khushal Khattak Baba Praising Beauty. Understanding Khushal
خوشحال بابا د نسواني حسن سره ډېره مينه لره۔
د خوشحال بابا شخصيت د جلال او جمال يو سپېځلے امتزاج لري۔دۀ چې چرته د خپل فطرت او مزاج مطابق د وسلې ذکر کړے دے نو هلته ئې د زنانه ؤو د کالو پترو اظهار هم کړے دے۔
کالي پتري چې د زنانه وو د ښائست او ډول و سنګار يو اهم جز دے۔لکه د دنيا د هرې سيمې پښتنې زنانه هم که معمول وي که قيمتي په کالوپترو مئينې وي۔دا د دوي فطرت سره اړه لري۔
زنانه عام تور د خپل بدن د مختلفو اعضاؤ لکه پښو,لاسونه,پوزے,غوږونه,ګوتو او نورو د ډول وسنګار کولو او د حسن و ښکلا زياتولو د پاره مختلف قسمه کالي پتري استعمالوي۔
لکه چې خوشحال بابا وائي۔
دپسالۀ صفت ئې شي د رنګ ئې نۀ شي
څوک چې پورې په بدرنګه ناوې پسول کا
او د دې په حقله يو بل ځائے کښې وائي۔
په پساله به مينه کاچې رنګ ئې نۀ وي
تۀ ګل رنګه څۀ محتاجه د پسالۍ
د خوشحال بابا معشوقه د کالو پترو نه بغېر هم ښائسته ده ۔هغې ته دا ډول و سنګار هېڅ حاجت نشته۔ ځکه چې وائي۔
نن د واړو دلبرانو غورۀ تۀ ئې
که دې يو لونګ په پوزه زېور نشته
او که کله دا کالي واچوي هم نو دا پرې نه بلکې کالي پرې ښائسته ښکاري۔
په کاليو سره مخ ښائسته کېږي
ستا په مخ ښائسته ستا د مخ کالي دي
مخ چې په پسول سره تا وته زېبا کا
ګڼه يو ټک دے مکر و فرېب کا
هر کله چې خوشحال بابا د نسواني حسن شېدائي ؤ۔په دا وجه د دې موضوع ته ډېره زيات اهميت ورکوي۔
د خوشحال خټک د پاره چې مېخور شو
په مغان مې وښي کېښول باهو هم لا
"وښي" او "باهو" يو کالے دے چې زنانه ئې په لاسونو کښې اچوي۔
پائېل چې ورته پنزېب هم وائي۔ د زنانه وو د پښو کالے دے ۔دا عام طور سره د سپينو زرو نه جوړولے شي۔ په دې کښې ګنګروګان هم وي۔
د پالګو او د څړې ئې شرنګهار شو
زۀ له خوبه راپرتاب شوم ډېر په ويره
پېزوان هم د زنانه وو د پوزې يو مشهور کالے دے ۔دا به د سرو او د سپينو زرو دواړو نه جوړولے شو۔
چې تر اور تر اوبو وځي هله ورشي
سور پېزوان د شاه د پوزې تر سوراخه
چار ګل هم د زنانه وو د پوزې يو مشهور کالے دے۔
وے مې چې له نتې دې چارګل په پوزه زېب که
وے ئې دا خبرې کړه هله که چا په تا کړې
لونګين د ګلونو امېل ته وائي۔کله چې د رېښمو ځونډې او لونګ يو ځائے په تار کښی وپېللے شي نو لونګين ورته وائي۔
کښېنه په انګڼ کښې مخامخ چې درته ګورم
تورلونګين دواړه چندڼ هار په سينه ټال کړه
کتابيات۔کليات خوشحال خان خټک۔مقدمه دوست محمد کامل
مياشتنۍ پښتو
خوشحال نمبر
ليک ۔۔نوري
Comments
Post a Comment
Thanks for visiting Pashto Times. Hope you visit us again and share our articles on social media with your friends.