Why People Learn Languages? Why Learn Pashto Language?
خلق نورې ژبې ولې زده کوي
محمد علي ديناخېل
د نورو ژبو د زده کولو يو شمېر وجوهات به تاسو ته هم معلوم وي ۔ يو څو وجوهات به دلته وليکم چې خلق ولې نورې ژبې زده کوي ۔ خو په دې هفته کښې راته د هنګري يو ارکيټيکټ انجينير (چې په دې عکسونو کښې يې تاسو ليدلے شئ) او يوې المانۍ پېغلې د پښتو ژبې د زده کولو داسې عوامل وښودل چې زۀ يې حيران هم کړم او ډېر پرې خوشحاله هم شوم ۔ راځۍ چې اول هغه عام محرکات اوګورو چې د هغوي په وجه خلق نورې ژبې زده کوي ۔ په نورو ژبو کښې د نورو علمونو د زده کولو د پاره ، د مختلفو ژبو د ويونکيو په کلتور او تاريخ ځان د پوهه کولو د پاره، د دفاعي نظام د مضبوطولو د پاره ، په يوه ټولنه کښې ځان د ضم کولو د پاره او د يواځي والي نه ځان د ساتلو د پاره، په يوه ژبه کښې د روزګار موندلو دپاره، د يو مذهب د تبليغ د پاره، خپل کاروبار ته د ودې ورکولو د پاره، د مختلوخلقو په باره کښې د مثبت رويې او د تعصب د کمولو د پاره، د تخليقي صلاحيتونو د ودې د پاره، د کميونيکېشن سکيلز د تېزولو د پاره، نورو هېوادونو ته د سفر کولو د پاره، د سفارت کارۍ د پاره، په نړيوال اقتصاد کښې د برخې اخستلو د پاره، د خپلې ژبې او کلتور د غني کولو د پاره، په انساني فطرت د پوهېدلو د پاره، د ټولنيزې هم اهنګۍ او برداشت د زياتولو د پاره، د وېرې او د بد اعتمادۍ د ختمولو د پاره، د زېبا هنرونو د ودې د پاره، په څېړنيز کار کښې ځان يو اصلي ماخذ ته د رسولو د پاره، د مهاجرت د پاره، په ټيکنالوجۍ د ځان پوهه کولو د پاره، په قانون د ځان پوهه کولو د پاره،او د اعلي تعليم او تحقيقي د پاره خلق نورې ژبې زده کوي ۔
په دې عکس کښې دا نولس کلن ځوان هلک چې لازلو نوميږي د هنګري اوسېدونکے دے او په ايټاليا کښې د ارکيټيکټ انجينئيرنګ سبق وائي، د ډېر وخت نه د پښتو د زدکړې د پاره زما سره په رابطه کښې وۀ په دې اونۍ کښې زما د ليدلو د پاره برلن ته راغے ۔ په خبرو خبرو کښې مې ترې تپوسونو اوکړل چې پښتو ولې زده کوي نو راته يې ووئېل چې په پوهنتون کښې به مې اورېدل چې کوم افغان مهاجر د ترکي نه يورپ ته راځي نو په سربيا او نورو هېوادونو کښې د ډېرو تکليفونو سره مخ وي او هر قسمه مرستې ته اړتيا لري ۔ وئېل چې خپل يو مقامي تنظيم مو جوړ کړو او دغه کېمپونو ته به تللو او د افغان مهاجرو مرسته به مو کوله ۔ زما د پوښتنې په جواب کښې چې په دغه مهاجرو کښې خو د نورو ژبو خلق هم وي نو بيا تا پښتو ولې زده کول شروع کړل ولې نه نورې ژبې هغه ووئېل چې پښتانۀ ځوانان راته ډېر د همت او حوصلې وړ ښکاره شول ۔ ډيرې سختې به پرې تېرې شوې خو حوصله به يې نه بائېلله نو د دوي سره په مينه کښې مې خپل خدمات صرف دوي ته وقف کړل او پښتو زدکړه مې شروع کړه ۔ د يادونې وړ ده چې دے خپله د انجينئيرۍ سبق وائي او انجينير به جوړيږي خو صرف د خلقو د خدمت جذبه صرف هغه محرک دے چې دے يې پښتو ژبې زده کولو ته مجبور کړو۔
يو دوه هفتې مخکښې په پوهنتون کښې د پښتو د زده کونکيو طالب علمانو سره مې يو نشست وشو ۔ په دې کښې د پښتو ژبې د زياتو زده کونکيو لامل پښتو د روزګار د پاره زده کول وو خو يوې المانۍ پېغلې ووئېل چې زۀ پښتو ځکه زده کوم چې د يو پښتون هلک سره مينه لرم او غواړم چې هغه خپل کړم او د هغه سره مينې زۀ مجبوره کړم چې پښتو زده کړم ۔ د يادونې وړ ده چې د پښتو د زده کونکيو په دغه کلاس کښې دغه پېغله تر ټولو قابله هم وه او پښتو ورله ښۀ ورتله ۔
نو پته اولګېدله چې ژبې يواځې د روزګار د پاره نۀ وي خو خلق يې د خدمت او مينې محبت د پاره هم زده کوي ۔
Comments
Post a Comment
Thanks for visiting Pashto Times. Hope you visit us again and share our articles on social media with your friends.